Toshkentda Vengriya bilan hamkorlikda shifobaxsh o‘simlikdan noyob dori vositasi ishlab chiqarilishi mumkin, deb xabar bermoqda “Dunyo” axborot agentligi.
Keltirilishicha, Vengriyaning yetakchi iqtisodiy nashrlaridan birida “Vengriya ishtirokida Toshkentda Nobel mukofoti sovrindori tomonidan kashf qilingan shifobaxsh o‘simlikdan dori vositasi ishlab chiqarilishi yo‘lga qo‘yilishi mumkin” sarlavhali maqola e’lon qilingan.
“Shirin shuvoq ming yillar davomida xitoyliklar va yevropaliklar tomonidan ishlatilgan o‘simliklardan biridir. 2015-yilda xitoylik tadqiqotchi Tu Yuyu bezgakni davolashda 100 foiz samaradorlikni ko‘rsatgan shirin shuvoqning faol komponentini ajratib olgani va undan bezgakka qarshi dori yaratgani uchun Nobel mukofotiga sazovor bo‘ldi.
Yaqinda ming yillik dorivor o‘simlik Vengriya-O‘zbekiston tadqiqot va innovatsion loyihasining asosiy elementiga aylandi. Asosiy ishlanmalar Debresen universitetining farmatsevtika fakultetida amalga oshirilmoqda va Toshkent dori vositalari ishlab chiqarish markaziga aylanish istagini bildirdi”, – deya Debresen universiteti dekani Ildiko Backay so‘zlaridan iqtibos keltirilgan maqolada.
Dorivor o‘simliklardagi faol moddalarning tarkibi beqaror va ko‘plab tashqi omillarga, jumladan, iqlim va tuproqqa bog‘liq. Davom etayotgan Vengriya-O‘zbekiston ilmiy-tadqiqot loyihasi ushbu omillarning ayni zavoddagi faol komponentlar tarkibiga qanday ta’sir qilishini o‘rganmoqda.
Nashrda loyihaning O‘zbekiston tomonidan ishtirokchisi Toshkent farmatsevtika instituti, sanoat hamkori esa Vengriyaning “Meditop Gyógyszergyártó Kft.” farmatsevtika kompaniyasi ekani ma’lum qilingan.
2023-yil iyul oyida Vengriya tashqi ishlar va savdo vaziri hamda O‘zbekiston investitsiyalar, sanoat va savdo vaziri Laziz Qudratov Budapeshtda O‘zbekiston tomoni Toshkent yaqinida Vengriya farmatsevtika sanoati vakillari uchun maxsus iqtisodiy zona tashkil etish niyatida ekanini ma’lum qilgan edi.
Avvalroq prezidentning “Farmatsevtika tarmog‘ini jadal rivojlantirishga oid qo‘shimcha chora-tadbirlar to‘g‘risida”gi farmoni bilan farmatsevtika sohasidagi startap loyihalarni moliyalashtirish uchun venchur jamg‘armasi tashkil etilishi xabar qilingandi.
Shuningdek, 2025-yil 1-apreldan cheklangan savdo ustamalari faqat retsept bilan beriladigan dori vositalari toifasiga nisbatan tatbiq etilishi haqida xabar berilgandi.
Izoh (0)