Birlashgan Arab Amirliklarida faoliyat yuritayotgan Rossiya kompaniyalarining bank hisoblari ommaviy tarzda yopilmoqda. Bu haqda RBC xabar berdi.
Ma’lum qilinishicha, so‘nggi oylarda BAA banklari mamlakatda soni 4 mingdan oshib ketgan Rossiya kompaniyalarini tekshirish va “tozalash” jarayonini boshlab yuborgan. Shu bilan birga, to‘lovlarni monitoring qilish tizimi ham sezilarli darajada kuchaytirilgan.
Konsalting kompaniyalari va yuristlarning aytishicha, rus kompaniyalarining qariyb 20–30 foizi bank tekshiruvlari, faoliyatga nisbatan cheklovlar yoki hisoblarning to‘g‘ridan-to‘g‘ri yopilishiga duch kelmoqda.
Hisob hatto mijoz bank qo‘ng‘irog‘iga javob bermasa yoki belgilangan muddatda zarur hujjatlarni taqdim qilmasa ham yopilishi mumkin. Ayrim hollarda banklar mijozlardan 24 soat ichida 20 tagacha sertifikatlangan hujjatlarni taqdim etishni talab qilmoqda.
Shuningdek, yuristlarning bildirishicha, banklar sanksiyalarga rioya etilishi ustidan nazoratni kuchaytirgan. Natijada nafaqat cheklovga uchragan kompaniyalar, balki AQSH, Yevropa Ittifoqi va Buyuk Britaniya tomonidan sanksiya ro‘yxatiga kiritilgan sheriklar bilan ishlayotgan firmalarning ham hisoblari yopilmoqda.
Ma’lumot o‘rnida, Rossiya so‘nggi paytlarda G‘arb davlatlariga sanksiyalarni yumshatish borasida murojaat qilib kelmoqda. Moskvaning asosiy talablaridan biri — rus banklari uchun SWIFT tizimiga kirishni qayta tiklashdan iborat.
Ayni paytda, Yevropa Ittifoqi Rossiyaga qarshi kiritgan asosiy moliyaviy sanksiyalardan biri bu — banklarning SWIFT tizimidan uzilishi bo‘lib, bu chora Rossiya iqtisodiyotini zaiflashtirish va Ukrainadagi urushni tugatishga qaratilgan.
Izoh (0)