Kiberxavfsizlik sohasida faoliyat yurituvchi Malwarebytes kompaniyasi o‘tkazgan xalqaro tadqiqotga ko‘ra, iPhone egalarining internetdagi firibgarliklar qurboni bo‘lish ehtimoli Android foydalanuvchilariga qaraganda yuqoriroq. Bu haqda Lifehacker.ru nashri ma’lum qildi. So‘rovnomada AQSH, Buyuk Britaniya, Germaniya, Avstriya va Shveysariyadan 1 300 nafar foydalanuvchi ishtirok etgan.
Mutaxassislarning xulosasiga ko‘ra, ko‘plab iPhone foydalanuvchilari Apple brendining obro‘siga va qurilmadagi avtomatik xavfsizlik tizimlariga haddan tashqari ishonib, qo‘shimcha himoya choralarini ko‘rmaydi. Bu esa ularni internetdagi firibgarliklarga ko‘proq uchrashiga sabab bo‘ladi.
Masalan, ko‘p hollarda foydalanuvchilar fishing (ya’ni, yolg‘on xabarlar orqali shaxsiy ma’lumotlarni qo‘lga kiritishga qaratilgan firibgarlik) qurboniga aylanadi yoki infostealer deb ataladigan zararli dasturlar orqali ularning login, parollari va boshqa maxfiy ma’lumotlari o‘g‘irlanadi.
“Hozirda har qanday raqamli ma’lumotga nisbatan tanqid bilan qarash ko‘nikmasini rivojlantirish muhim. Bu qoida matnli xabarlardan tortib, internetdagi qidiruv natijalari, elektron pochtadagi havolalar va ilovalargacha tegishli. Bugungi kunda faqat hushyorlik va ogohlik orqali o‘zingizni himoya qila olasiz”, deydi Malwarebytes kompaniyasining vitse prezidenti Maykl Shervud.
Tadqiqotdan olingan asosiy xulosalar:
iPhone foydalanuvchilarining 53 foizi hayotida kamida bir marta bo‘lsa ham internet firibgarligining qurboni bo‘lgan. Bu ko‘rsatkich Android foydalanuvchilari orasida 48 foizni tashkil etadi;
Android foydalanuvchilarining 29 foizi telefoniga maxsus xavfsizlik dasturlarini o‘rnatgan. iPhone foydalanuvchilarida bu ko‘rsatkich bor-yo‘g‘i 21 foiz;
Android qurilmasi egalarining 41 foizi har bir akkaunt uchun alohida parol ishlatsa, iPhone foydalanuvchilari orasida bu raqam atigi 35 foiz;
iPhone egalari orasida 47 foiz foydalanuvchi arzon narxdagi mahsulotlarga aldanib, ishonchsiz internet do‘konlardan xaridlar qilgan. Android foydalanuvchilari orasida bu 40 foizni tashkil qiladi.
Garchi smartfon va dasturiy ta’minoti ishlab chiqaruvchilar qurilmalarni himoyalash uchun yangi yechimlar taklif etayotgan bo‘lsa-da, hech bir tizim to‘liq xavfsizlikni kafolatlay olmaydi. Malwarebytes kompaniyasi internetdan foydalanishda shaxsiy xavfsizlik mas’uliyati avvalo foydalanuvchining o‘ziga bog‘liqligini eslatib o‘tdi.
Izoh (0)