Hindiston bosh vaziri Narendra Modi Uttar-Pradesh shtatidagi Varanasi shahrida o‘tkazilgan saylovoldi mitingda Pokistonni jiddiy ogohlantirdi. Unga ko‘ra, agar Pokiston tomonidan yana biror “gunoh” sodir etilsa, Hindiston zamonaviy qurollari, xususan, “BrahMos” raketalari bilan javob qaytaradi. Bu haqda RBC xabar berdi.
Bosh vazir may oyida bo‘lib o‘tgan mojarolarda hind harbiy texnikasi sabab g‘alaba qozonilganini ta’kidlagan.
“May oyida o‘tkazilgan ‘Sindur amaliyoti’ orqali butun dunyo Hindistonning milliy qurollari nimalarga qodirligini ko‘rdi. Havo mudofaasi, dronlar, raketalar — ayniqsa ‘BrahMos’ — bizning qudratimiz ramzidir”, dedi Modi.
U Hindiston va Rossiya hamkorligida ishlab chiqilgan “BrahMos” tezkor raketasi Pokistonda odamlarni tashvishga solib, ularni tunlari bedor ushlab turish uchun yetarli ekanini ta’kidlagan.
Ma’lumot uchun, “BrahMos” Aerospace kompaniyasi tomonidan ishlab chiqilgan bu raketalar yer, dengiz va havo orqali uchiriladigan turga ega. Yaqinda Uttar-Pradeshdagi Lakxnau shahrida yangi zavod ishga tushirilib, u yerda keyingi avlod “BrahMos-NG” raketalari ishlab chiqarilishi rejalashtirilmoqda. Ular og‘irligi jihatidan yengilroq (taxminan 1,2 tonna) bo‘lsa-da, 300 km masofani bosib o‘tishga qodir bo‘ladi.
May oyida Hindiston Pokistonga qarshi “Sindur” nomli harbiy operatsiyani amalga oshirgandi. Bu harakat Jammu va Kashmirda sodir etilgan terakt (26 kishi halok bo‘lgan) ortidan boshlangan. Hindiston bu hujum uchun “Lashkari Taiba” bilan bog‘liq “Qarshilik fronti” guruhini ayblagan. Pokiston esa bu da’volarni rad etib, qo‘shni davlatga qarshi harbiy operatsiyalarni boshlagan edi. Bir necha kundan so‘ng tomonlar AQSH vositachiligida o‘t ochishni to‘xtatishga kelishib olgan.
Izoh (0)