Xitoy o‘z iqtisodiyotini yuksaltirish uchun Yevropa bilan munosabatlarini yaxshilashga intilmoqda va Moskvadan “masofa saqlashga” harakat qilmoqda, deb yozadi The New York Times (NYT).
Gazeta bunga misol sifatida Xitoy Kommunistik partiyasi Markaziy qo‘mitasining tashqi ishlar komissiyasi bo‘limi boshlig‘i Van Ining yaqinda Yevropa mamlakatlari bo‘ylab safarini keltirdi, uning asosiy maqsadi mamlakati “iqtisodiyotini zudlik bilan tiklash va umumiy til topishish uchun Yevropa davlatlarining e’tiborini tortish” edi. NYT bilan suhbatlashgan tahlilchilar, Van I shuningdek, Moskvani bevosita qo‘llab-quvvatlashdan bosh tortganini, “Xitoy inqirozning cho‘zilib ketishi va kuchayishini istamasligini” ta’kidlaganini eslatdi.
Shu bilan birga, nashrning qayd etishicha, AQSH Pekinning muloqot o‘rnatishga urinishlariga qaramay, unga jiddiy bosim o‘tkazmoqda. Taxminan ikki yillik “sovuq munosabatlar”, yirik sarmoyaviy kelishuvning barbod bo‘lishi va Ukrainadagi urushdan so‘ng, Yevropa yetakchilari Xitoy o‘z ohangini yumshatishini va o‘zi bilan Moskva o‘rtasidagi masofani yanada uzoqlashtirishga tayyorligini ko‘rsatishga umid qilayotgandi, deya ta’kidlaydi tahlilchilar. Buning o‘rniga janob Van Myunxendagi xavfsizlik konferensiyasiga kelib, “josus shar” hodisasi yuzasidan AQSH bilan keskin tortishdi hamda Vashingtonning reaksiyasini “bema’ni va isterik” deb atadi, deyiladi maqolada.
Shu bilan birga, tahlilchilarning ta’kidlashicha, Xitoy Yevropa bilan yaqinlashishga urinib, faqat AQSHni tanqid qilmoqda. Ular Ukrainadagi urushda Pekinning Moskvani bevosita qo‘llab-quvvatlashni istamasligi Yevropa Ittifoqi bilan savdo aloqalarini jonlantirish niyatidan dalolat berishini istisno qilmadi. Xitoy G‘arb bilan munosabatlarning yanada yomonlashuviga yo‘l qo‘ymaslik uchun Si Szinpinning Moskvaga tashrifi ahamiyatini pasaytirishi mumkin, deb yozadi gazeta. Bundan tashqari, NYT tahlilchilari Si Szinpin Rossiyaga tashrif buyurishdan avval G‘arbiy Yevropa poytaxtlariga kelishi mumkinligini rad etmayapti.
Ukrainada urush boshlanganidan keyin Xitoy Rossiyaga qarshi sanksiya qo‘llamadi va boshqa davlatlarning sanksiyalarini qoraladi. Bundan tashqari, Xitoy rahbari Si Szinpin mojaroni tezroq tugatishga chaqirdi va uni siyosiy jihatdan hal etish barcha Osiyo va Yevropa davlatlari manfaatlariga mos kelishini taʼkidladi. Fevral oyi o‘rtalarida o‘tkazilgan Myunxen konferensiyasi chog‘ida Van I “barcha mamlakatlar suvereniteti”ni hurmat qilgan holda mojaroni hal qilish bo‘yicha Xitoy rejasini e’lon qildi. Bloomberg agentligiga ko‘ra, Pekinning Ukrainadagi urushni tugatish rejasi o‘t ochishni to‘xtatishga chaqirish va Kiyevga qurol-yarog‘ yetkazib berishni to‘xtatish kabilarni nazarda tutadi.
Izoh (0)