AQSH prezidenti Donald Trampning tahdidlari tufayli Fransiya Grenlandiyaga qo‘shin yuborishni rejalashtirmoqda. Bu haqda Politico xabar berdi.
Fransiya tashqi ishlar vaziri Jan-Noel Barro qo‘shin yuborilishini istisno etmadi.
“Biz bu masalani Daniya bilan muhokama qilishni boshladik. U bizning xavfsizlik tahdid ostida qolsa, uni ko‘rib chiqishga tayyor edi”, dedi vazir.
Barro AQSH prezidentining tahdidlariga javoban Yevropa ittifoqi (YI) chegaralari muhokama qilinmasligini aytdi. U hech kim Yevropa ittifoqi bilan ziddiyatdan manfaatdor emasligini ta’kidladi.
“Daniya agar Yevropa davlatlaridan birdamlik so‘rab murojaat qilsa, Fransiya bu chaqiriqqa javob berishga tayyor bo‘ladi. Hozirgi bosqichda Daniyaning bunday istagi yo‘q”, dedi vazir.
Daniya Grenlandiya mudofaasini kuchaytirish uchun 2 mlrd dollar sarflaydi
Qirollik AQSH prezidentining da’volari fonida Grenlandiya mudofaasiga 14,6 milliard krona (2,05 milliard dollar) sarmoya kiritishga qaror qildi. Mablag‘ vertolyot va dronlarni tashiy oladigan uchta yangi Arktika kemasiga sarflanadi. Shuningdek, ro‘yxatda hududni uzoq masofadan nazorat qilish uchun suratga olish imkoniyatlari kengaytirilgan ikkita uzoq masofali dron mavjud.
Mintaqada sodir bo‘layotgan voqealardan tezkor xabardorlikni oshirish va razvedkaga alohida e’tibor qaratiladi. Shu sabab mablag‘larning bir qismi sun’iy yo‘ldosh salohiyatini oshirish va yer usti kuzatuv vositalariga sarflanadi. Bundan tashqari, hukumat aholini favqulodda vaziyatlarga tayyorlashga hissa qo‘shadi.
2025-yilning keyingi davrida Arktikada tiyib turish choralarini kuchaytirish maqsadida yana bir bitim imzolanishi kutilmoqda. Bu qaror Grenlandiya va Farer orollari hukumatlari bilan yaqin hamkorlikda qabul qilingan.
Tramp Grenlandiyani o‘zlashtirmoqchi
AQSHning saylangan prezidenti bir necha bor Grenlandiya AQSH tarkibiga kirishi kerakligini aytgandi. U orol milliy xavfsizlik va himoya uchun, jumladan, Xitoy va Rossiyadan himoyalanishda strategik ahamiyatga egaligini aytgan. Grenlandiya bosh vaziri Muke Egede bunga javoban orol “hech qachon sotilmaydi” deb javob bergan. Shu bilan birga, u orol Daniyadan mustaqillikka erishmoqchi ekanini tan olgan. U Tramp bilan ayrim masalalarni muhokama qilishga tayyor.
Bloomberg manbalariga ko‘ra, Tramp jamoasi Grenlandiya bilan qiziqishgan, chunki orolda elektron qurilmalarda ishlatiladigan oltin, olmos, uran va nodir metallarning katta zaxiralari mavjud. AQSHning Grenlandiya mineral-xomashyo sektoriga kiritgan sarmoyasi dunyoning nodir metallar bozorida Xitoyning hukmronligiga qarshi kurashda hal qiluvchi rol o‘ynashi mumkin.
Trampning tahdidlari tufayli Daniya Grenlandiya mudofaasini kuchaytirib, gerbini o‘zgartirgan. Qirol Frederik X Norvegiya va Shvetsiya bilan ittifoqqa ishora qilgan va 500 yildan ortiq vaqt davomida gerbda bo‘lgan uchta tojni olib tashlashni buyurgan.
Grenlandiya va Farer orollari ramzlari — oq ayiq va qo‘chqor ikki qismga bo‘linib, ikkinchi va uchinchi maydonlarga ko‘chirilgan, ya’ni kattalashtirilgan. Daniya va Janubiy Yutlandiya ramzlari esa birinchi va to‘rtinchi maydonlarga o‘tkazildi.
Izoh (0)