Хитой ташқи ишлар вазири Ван И Мюнхен хавфсизлик конференцияси очилишида сўзга чиқди. Дипломат ўз мамлакатининг кўп қутбли дунёга содиқлигини таъкидлади.
Хитой учун европаликлар ҳамкор, рақиб эмас. Ва бу бизнинг кўп қутбли дунёмизда жуда муҳим сиёсатдир, деди у.
Бундан ташқари, Ван И АҚШ ҳукуматини Хитойни тийишга уринишдан огоҳлантирди. ХХР вакилининг сўзларига кўра, бу Пекиннинг қатъий чора-тадбирларига сабаб бўлади.
Ван И, шунингдек, Россия ва Украина ўртасидаги эҳтимолий сулҳ музокараларига изоҳ берди.
Пекин Украина можаросини ҳал қилишга ёрдам берадиган барча саъй-ҳаракатларни, жумладан, сўнгги кунларда АҚШнинг Россия билан келишувга эришганини олқишлайди. Барча томонлар муносиб вақтда Украина бўйича тинчлик музокараларида иштирок этиши лозим, дея қўшимча қилди дипломат.
У Хитойнинг Россия газидан воз кечишга тайёр эмаслигини таъкидлади, чунки бошқа давлатлар ХХР талаб қилган миқдордаги ресурсларни етказиб бера олмайди.
Аксар давлатлар Хитойга босим ўтказиш учун иқтисодий ва савдо масалаларини сиёсийлаштирмоқда. Биз бунга йўл қўя олмаймиз, деб хулоса қилди Ван И.
Хавфсизлик бўйича Мюнхен конференцияси 1963 йилдан бери ўтказиб келинмоқда, дастлаб у НАТО вакилларининг учрашуви сифатида ташкил этилган эди. 1990 йилларнинг охирида Шарқий Европа мамлакатлари, шунингдек, Хитой ва Ҳиндистон ҳам иштирок этишга таклиф қилина бошланди.
“Россия ва Хитой Европа учун асосий таҳдид эмас” — АҚШ вице-президенти
Ушбу конференцияда иштирок этган Америка вице-президенти Ж.Д.Венс АҚШ Россия ва Хитой томонидан қитъага бўлаётган таҳдиддан кўра, Европанинг “ичкарисидан келаётган хавф”дан кўпроқ хавотирда эканини айтди.
Европага нисбатан мени энг кўп ташвишга солаётган таҳдид бу Россия ёки Хитой эмас. Мен ичкаридан келаётган таҳдид — Европанинг энг асосий қадриятларидан чекинишидан хавотирдаман, деди Венс.
Вице-президент Руминияда Россия аралашуви баҳонасида конституциявий сайловлар бекор қилинганини мисол қилиб келтирди. Шунингдек, у Европа давлатларида цензура ва миграция сиёсатини танқид қилди.
Бугун Европага қараганимда, “Совуқ уруш” ғолибларининг баъзилари қандай аҳволга келиб қолганини кўриб ҳайрон бўламан, дея хулоса қилди Венс.
Изоҳ (0)