Nyu York hayvonot bog‘i o‘zining ijtimoiy tarmoqdagi sahifasida pingvinlar, jirafalar, yalqovlar, kapibaralar va boshqa hayvonlar chizgan rasmlar suratini joylashtirdi. Ushbu san’at asarlari gala-auksionda namoyish etiladi.
“Rassomlarimiz yaqinda bo‘lib o‘tadigan “Animal art auction”da o‘z durdona asarlarini namoyish etish uchun tinmay mehnat qilmoqda”, deyiladi postda.
Hayvonot bog‘i xodimi Mikayla Konvey ijodiy jarayon haqida so‘zlab berdi. Rasm chizish hayvonlar uchun nafaqat o‘quv mashg‘ulotiga, balki jarayondan zavq olish va o‘z his-tuyg‘ularini ifodalashning bir usuliga ham aylangan.
Ammo bu natijaga hayvonlarga motivatsiya beradigan narsa — tamaddi berib turish orqali erishildi. Misol uchun, pingvinlar ularga mazali mukofot va’da qilinishi eshitgach, rasm chizishga mas’uliyat bilan yondasha boshlagan.
“Pingvinlarimizni rasm chizishga undashning eng oson yo‘li bu tamaddi”, dedi Konvey.
The Dream Big Gala: Night Out on the Town nomli katta auksion joriy yil 15-mart kuni bo‘lib o‘tadi. Lotga hayvonlar tomonidan chizilgan san’at asarlari kiritiladi. Ayni paytda ijtimoiy tarmoqlarda ushbu rasmlarning ba’zilari namoyish etilgan. Kimoshdi savdosi ham onlayn tarzda o‘tkaziladi va undan tushgan mablag‘ hayvonot bog‘i xarajatlari va hayvonlar ehtiyojlariga sarflanadi.
Izoh (0)