O‘zbekistonga qo‘shni respublikalar elektron sigaretlarni butunlay taqiqlamoqchi

Qirg‘iziston va Qozog‘iston elektron sigaretlarni butunlay taqiqlashni ko‘rib chiqmoqda. Bu haqda Sputnik xabar berdi. 

Qirg‘iziston parlamenti elektron sigaretlar va veyplarni olib kirish, sotish va ulardan foydalanishni taqiqlashni taklif qilmoqda. Ulardan foydalanish maktab o‘quvchilarining sog‘lig‘iga sezilarli darajada zarar yetkazishi ta’kidlanadi.

“Elektron sigaret va veyplar paydo bo‘lguniga qadar yoshlar orasida chekishning tarqalishi 10 yil davomida pasayib kelayotgan edi. Biroq elektron tamaki mahsulotlar an’anaviy sigaretlarning xavfsiz muqobili sifatida qaralishi uning maktab o‘quvchilari orasida mashhurligini va undan foydalanishni oshirdi”, — deyiladi xabarda.

Qirg‘izistonda elektron sigaret chekkanlik uchun 40 ming som (taxminan 448 dollar), sotish uchun esa 50 ming somdan 60 ming somgacha (560–672 dollar) jarima solish taklif qilinmoqda.

Ikki hafta oldin Qozog‘iston parlamenti veypni to‘liq taqiqlashni ma’qullagan edi. Ularni sotish uchun 50 sutkagacha, olib kirish va tarqatish uchun esa 2 yilgacha ozodlikdan mahrum qilishni nazarda tutadi.

Turkmanistonda esa elektron sigaretlar sotish taqiqlanadi. Rasmiylar vaziyatni nazoratga olishdan oldin mamlakatda elektron sigaretlarga taqiq qo‘yilishiga qaramay undan foydalanish ko‘paygandi. Turkmanistonda rasmiylar uzoq vaqtdan beri tamakidan butunlay xoli davlat maqomiga erishishni maqsad qilgan. Sigaretlar doimiy ravishda yetishmaydi va juda qimmat. 2020-yilda ayollarga sigaret sotish rad etilgani haqida xabarlar paydo bo‘ldi. 2022-yil oxirida qonunchilikka rasman o‘zgartirishlar kiritilib, sigaret sotib olishning minimal yoshi 18 yoshdan 21 yoshgacha ko‘tarildi.