Qirg‘izistonda IIV xodimlarini tasvirga olish qonunan taqiqlanishi mumkin

Qirg‘izistonda politsiya xodimlarini videoga olishni taqiqlash taklifi ilgari surilmoqda.

Jogorku Keneshning bir qator deputatlari Jinoyat kodeksi hamda Qoidabuzarlik kodeksiga o‘zgartishlar kiritishni taklif qilgan. Qonun loyihasi parlamentga taqdim etilgan.

Dalolatnomada qayd etilganidek, loyihaning maqsadi va vazifasi davlat mansabdor shaxsiga yoki boshqa shaxsga qarshilik ko‘rsatish bilan bog‘liq huquqiy himoya standartlarini kiritish va bezorilik uchun jazo choralarini kuchaytirish, jamoat xavfsizligini ta’minlash bo‘yicha davlat kafolatlari samaradorligini oshirish, jamoat tartibini muhofaza qilish bo‘yicha vazifalarni bajarayotgan ichki ishlar organi xodimining qonuniy talabiga bo‘ysunmaganlik uchun javobgarlikni kuchaytirishdan iborat.

Qirg‘iziston IIV maʼlumotlariga ko‘ra, 2022-yilda ichki ishlar organlari xodimlarining qonuniy talablarini bajarmaslik bo‘yicha 82 ta, 2023-yilda esa 128 ta holat qayd etilgan bo‘lib, bu holatlar soni ortganidan dalolat beradi.

Qonun loyihasi ichki ishlar organlari xodimlarining obro‘sini tushirish yoki haqorat qilish, jamiyat nazdida kamsitish maqsadida o‘z xizmat vazifalarini bajarishiga qonunga xilof ravishda aralashish, fotosurat va videoga olish hamda internet saytlarida tarqatish holatlarini nazoratga olishni nazarda tutadi.

Ichki ishlar organlari xodimlarining faoliyatini obro‘sizlantirish uchun internet tarmog‘ida materiallarni keyinchalik tarqatish maqsadida foto va videoga olish 5 ming qirg‘iz so‘mi (taxminan 60 dollar) miqdorida jarima solishga yoki besh sutkadan yetti sutkagacha qamoqqa olishga sabab bo‘ladi.