Qirg‘iziston prezidenti So‘ronboy Jeenbekov karantin qoidalarini buzib, niqobsiz va masofa saqlamagan holda turib suratga tushgan mansabdor shaxslarni jazolashni buyurdi. Bu haqda 19-iyun, juma kuni mamlakat prezidenti saytida e’lon qilindi.
Ma’lum bo‘lishicha, internet tarmog‘ida hukumat apparati xodimlari, vazirlar, shuningdek, mamlakatning sobiq va amaldagi bosh vazir o‘rinbosarining niqobsiz, epidemiya vaqtida saqlanishi lozim bo‘lgan oraliq masofaga amal qilmagan holda tushgan surati tarqalgan va keng jamoatchilik muhokamasiga sabab bo‘lgan.
Ushbu surat 17-iyun kuni Qirg‘iziston bosh vaziri lavozimiga Qubatbek Bo‘ronov tayinlanganidan keyin tushilgan. Suratda odamlar bir-biriga yaqin turganini, birgina ayoldan boshqa hech kim niqob taqmaganini ko‘rish mumkin.
So‘ronboy Jeenbekov Xavfsizlik kengashi yig‘ilishida bu mavzuni ko‘tardi va sanitariya me’yorlarining bunday buzilishi haqiqatan ham nomaqbul holat ekanligini, bunday harakatlar koronavirus infeksiyasiga qarshi kurashdagi barcha harakatlarni yo‘qqa chiqarishini ta’kidlagan. Shu sababli hukumatning barcha a’zolarini jarimaga tortish bo‘yicha ko‘rsatma bergan. Faqat oddiy xodimlargina bundan mustasno, chunki ular, prezidentning fikricha, boshliqlarning buyrug‘i bilan chiqqan.
Qirg‘iziston qonunchiligiga ko‘ra, koronavirus bo‘yicha favqulodda vaziyat paytida jamoat joylarida niqobsiz yurish jismoniy shaxslar uchun 1 ming som (12 dollar), yuridik shaxslar uchun esa 5 ming som (60 dollar) jarima solinishiga olib keladi.
Mamlakat Jinoyat kodeksining 280-moddasiga ko‘ra, sanitariya-epidemiologiya qoidalarini qasddan yoki ehtiyotsizlik oqibatida buzish ommaviy kasallanish, odamlarning zaharlanishiga olib kelsa, 180 mingdan 220 ming somgacha (2,2-2,6 ming dollar) jarima yoki 2,5 yildan 5 yilgacha ozodlikdan mahrum qilish bilan jazolanadi.
So‘nggi ma’lumotlarga ko‘ra, Qirg‘izistonda koronavirusga chalinganlar soni 2789 nafarga yetgan. Ularning 1961 nafari sog‘aygan, 32 nafari vafot etgan.
Izoh (0)