Qirg‘iziston prezidenti Sadir Japarov tarkibida nikotin bo‘lgan elektron sigaretalarni olib kirish, muomalaga kiritish va ulardan foydalanishni taqiqlovchi qonunni imzoladi. Bu haqda Kabar xabar berdi.
Jo‘qorg‘i Kenesh tomonidan 23-oktyabrda qabul qilingan hujjat fuqarolarning sog‘lig‘ini tamaki mahsulotlarini iste’mol qilishning salbiy oqibatlaridan himoya qilishga qaratilgan. Qonunga asosan taqiqni buzuvchilar sezilarli miqdorda jarimaga tortiladi.
Jismoniy shaxslar uchun elektron sigaretalardan foydalanganlik 100, ularni sotganlik uchun 200 hisoblash ko‘rsatkichi (115 va 231 dollar)miqdorida jarima belgilangan. Yuridik shaxslar uchun jarima miqdori yuqoriroq bo‘lib, mos ravishda 600 va 650 hisoblash ko‘rsatkichini (60-65 ming som — 693-751 dollar) tashkil etadi.
Elektron sigaretalarni noqonuniy olib kirganlar ham jinoiy javobgarlikka tortiladi. Ma’lum miqdorda olib kirish bir yilgacha axloq tuzatish ishlari yoki 1200 gacha hisoblash ko‘rsatkichi (20 ming som — 1387 dollar) miqdorida jarimaga sabab bo‘ladi. Katta va yirik hajmlarda esa jarima 2 ming hisoblash ko‘rsatkichigacha (200 ming som — 2312 dollar) oshiriladi, jazo esa ikki yilgacha ozodlikdan mahrum qilishni o‘z ichiga olishi mumkin. Hujjat 2025-yil 1-iyuldan kuchga kiradi.
Qozog‘istonda ham veyplar sotish taqiqlangan
Aprel oyida prezident Qosim-Jo‘mart To‘qayev veyplarni mamlakatga olib kirish, ishlab chiqarish va sotishni taqiqlashni nazarda tutuvchi qonunni imzoladi.
Elektron iste’mol tizimlarini (veyp) olib kirish va ishlab chiqarish 2000 oylik hisob ko‘rsatkichi (16,5 ming dollar)gacha jarima, ikki yilgacha ozodlikni cheklash yoki xuddi shu muddatga ozodlikdan mahrum qilish bilan jazolanadi. Qonun, shuningdek, chekilmaydigan tamaki mahsulotlari, veyplar, aromatizatorlar va ular uchun suyuqliklarni reklama qilishni taqiqlaydi.
Izoh (0)