Qirg‘iziston prezidenti Sadir Japarov yo‘l harakati qoidalarini buzgan skuter va samokatlarni boshqargan shaxslar uchun ma’muriy javobgarlikni nazarda tutuvchi farmonni imzoladi.
“Qirg‘izistonda yo‘l harakati to‘g‘risida”gi qonunda “piyodalar”, “shaxsiy harakatlanish moslamalari” (elektrosamokatlar, elektr skeytbordlar, sigveylar, monog‘ildiraklar va boshqa shunga o‘xshash vositalar) tushunchalari kiritilmoqda. Qonun Jogorku Kenesh tomonidan 2024-yil 24-aprelda qabul qilingan.
Endilikda skuterni boshqarishda yo‘l harakati qoidalarini buzganlar 1 ming som (taxminan 144 ming so‘m) jarimaga tortilishi mumkin. Shuningdek, piyodalar yo‘lagidan harakatlanmagan, yo‘lni kesib o‘tgan, svetoforning qizil chirog‘ida harakatlangan fuqarolar jarimaga tortiladi.
Avvalroq O‘zbekistonda elektrosamokatlarda harakatlanishni cheklash taklif etilgandi. Makroiqtisodiy va hududiy tadqiqotlar institutiga ko‘ra, mamlakatda mazkur transport vositalarining betartib harakatlanishi piyodalar, velosipedchilar va avtomashinalar uchun qator muammolarni yuzaga keltirmoqda. O‘zbekistonda amaldagi yo‘l harakati qoidalariga “elektr samokat” tushunchasi kiritilmagan.
Izoh (0)