Qirg‘izistonda korrupsiyada ayblangan bojxona qo‘mitasi sobiq mansabdorining akasi parlamentda korrupsiyaga qarshi kurashish qo‘mitasi rahbariga o‘rinbosar bo‘ldi

Qirg‘iziston bojxona qo‘mitasi raisining o‘rinbosari Rayimbek Matraimovning (Rayimbek-million) akasi Iskander Matraimov mamlakat Juqorg‘i Keneshining qonunchilik, jinoyatchilikka va korrupsiyaga qarshi kurashish qo‘mitasining rahbariga o‘rinbosar bo‘ldi. Bu haqda Qirg‘iziston parlamenti matbuot xizmati xabar qilgan.

Undan tashqari rahbar o‘rinbosarlari lavozimlariga yana ikki nafar deputat Ruslanbek Jakishev va Bakit Tentishev saylangan. Saylanish jarayoni 13-yanvar kuni Juqorg‘i Keneshda yashirin ovoz berish yo‘li bilan amalga oshirildi. Bir kun avval deputatlar Juqorg‘i Keneshning 8 asosiy qo‘mitalariga rahbarlarni saylagan va paralament tuzilmasini tasdiqlagandi.

Qirg‘izistonda Konstitutsion palatasining sobiq sudyasi, siyosatchi Klara So‘ronkulova “Vesti.kg” nashriga hodisa yuzasidan izoh bergan vaqtida Matraimov mazkur lavozimda ishlashdan voz kechishi kerakligini qayd etgan.

“Respublikada siyosiy madaniyat yo‘q. Milliy kengash deputatlari jamoat tartibi, jinoyatchilikva korrupsiyaga qarshi kurash qo‘mitasi rais muovinlarini saylashda ularning qarindoshchilik aloqalarini hisobga olishi zarur. Deputatning ukasi “Korrupsiya” moddasi bo‘yicha javobgarlikka tortilgan. Iskander Matraimov ham vijdonan ish tutib, ushbu lavozimdan voz kechishi lozim edi. Ammo u bu ishni qilmadi, xalq vakillari esa unga ushbu mas’uliyatli lavozimni ishonib topshirdi. Kutamiz va uning korrupsiyaga qarshi qanday kurashishini kuzatamiz”, — degan siyosatchi ayol.

Rayimbek Matraimov 2021-yil 11-fevralida “Korrupsiya” moddasi bo‘yicha sud qilingan. Sobiq amaldor tergov bilan kelishib, davlat foydasiga 2 milliard qirg‘iz so‘mi (24 million AQSh dollari) miqdorida mablag‘ to‘lagach, qamoq jazosini qutilib qoldi (aslida mazkur modda sanksiyasi bo‘yicha aybdor deb topilgan mansabdor ozodlikdan mahrum qilinishi kerak). Sud Rayimbekga 260 ming so‘m (3 ming dollar) jarima jazosini tayinladi, bu jamoatchilikdan noroziliklarni vujudga keltirdi.

2021-yil oxirida bo‘lib o‘tgan parlament saylovlarida Matraimovning akasi Iskander partiyasiz, mustaqil nomzod sifatida qatnashdi va o‘z saylov okrugida g‘alaba qozondi.

2020-yildagi shov-shuvli parlament saylovlarida Iskander Matraimov “Mekenim Qirg‘iziston” partiyasidan nomzodini qo‘ygan, yakunda partiya saylovchilarning ovozini sotib olganlikda ayblangandi.