Qirg‘izistonning Bishkek shahrida belgilanmagan hududga chiqindi tashlagan fuqarolar videokameralar yordamida aniqlamoqda. Bu haqda Kaktus.media xabar berdi.
Tegishli usul bilan ikki nafar fuqaroga inspektorlar tomonidan Qirg‘iziston Jinoyat kodeksining 115-moddasi 1-qismi bilan bayonnoma tuzilgan. Bu 5,5 mingdan 17 ming somgacha (820 mingdan 2,5 million so‘mgacha) jarima solishga asos bo‘ladi. Belgilanmagan joylarda sanoat va tibbiy chiqindilarni tashlaganlar esa JK 115-moddasi 2-qismiga muvofiq 7,5 ming somdan 23 ming so‘mgacha (1 milliondan 3,4 million so‘mgacha) jarimaga tortiladi.
Munitsipalitet aholidan qoidalarga rioya etishni, tozalik va tartib uchun mas’uliyatli bo‘lishni so‘ragan.
Ma’lumot o‘rnida, 2023-yilda O‘zbekistonda belgilanmagan joyga chiqindi tashlaganlik, sanoat chiqindilarini tashlash kabi holatlar bilan bog‘liq 17 mingdan ortiq huquqbuzarlik aniqlanib, 7,6 milliard so‘m miqdorda ma’muriy jarimalar qo‘llangan.
O‘zbekistonda chiqindilarni belgilanmagan joyga tashlaganlik uchun jarima miqdori 10 baravarga oshirilishi kutilmoqda. Bunda qo‘shimcha ravishda yuridik shaxslarga nisbatan bazaviy hisoblash miqdorining 100 baravaridan 300 baravarigacha bo‘lgan miqdorda moliyaviy jarimalar qo‘llanadi.
Izoh (0)