Toshkentda 25-noyabrdan boshlab “Zo‘ravonlikka qarshi 16 kunlik faol harakat” global kampaniyasi boshlandi.
Ijtimoiy himoya milliy agentligi matbuot xizmatining ma’lum qilishicha, bu tashabbus Xalqaro ayollarga nisbatan zo‘ravonlikka qarshi kurash kuni munosabati bilan o‘tkaziladi. Kampaniya ayollar va bolalarga nisbatan zo‘ravonlikka barham berish uchun jamiyatning barcha qatlamlari sa’y-harakatlarini birlashtirish zarurligini eslatadi.
O‘zbekistonda oilaviy zo‘ravonlik sodir etayotganlar soni ortgan
2023-yil 11-aprelda “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimi yanada takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun qabul qilindi. Qonun bilan Jinoyat kodeksi 126-1-modda (oilaviy (maishiy) zo‘ravonlik) va Ma’muriy javobgarlik to‘g‘risidagi kodeks 59-2-modda (oilaviy (maishiy) zo‘ravonlik) bilan to‘ldirildi.
Oliy sud matbuot xizmati bergan ma’lumotga ko‘ra, 2024-yilning 10 oyi davomida Ma’muriy javobgarlik to‘g‘risidagi kodeksning 59-2-moddasi bilan 15 427 kishi ma’muriy javobgarlikka tortilgan. Ularning 9 210 nafariga jarima jazosi, 6 217 nafariga esa ma’muriy qamoq jazosi qo‘llanilgan. Jinoyat kodeksining 126-1-moddasi bilan esa 399 kishi sudlanib, ularning 126 nafariga ozodlikdan mahrum qilish jazosi, 255 nafariga esa ozodlikdan mahrum qilish bilan bog‘liq bo‘lmagan jazolar tayinlangan. 18 nafar shaxs shartli hukm qilingan.
2023-yilda (amalga kiritilgan kundan boshlab) Jinoyat kodeksining 126-1-moddasi bilan 203 nafar shaxs sudlanib, ularning 59 nafariga ozodlikdan mahrum qilish jazosi, 144 nafariga esa ozodlikdan mahrum qilish bilan bog‘liq bo‘lmagan jazolar tayinlangan. Ma’muriy javobgarlik to‘g‘risidagi kodeksning 59-2-moddasi bilan esa 8 928 nafar shaxs ma’muriy javobgarlikka tortilib, ularning 5 229 nafariga jarima jazosi, 3 699 nafariga esa ma’muriy qamoq jazosi qo‘llanilgan.
Bundan ko‘rinadi-ki, oilaviy zo‘ravonlik sodir etayotganlar soni ortgan.
Qo‘shni davlatlarda vaziyat qanday?
Qirg‘izistonda 2024-yilning 10 oyi davomida 14 293 ta oilaviy zo‘ravonlik holati qayd etilgan. 2023-yilning shu davrida bu ko‘rsatkich 10 416 tani tashkil etgan, ya’ni oilaviy zo‘ravonlik holati 2024-yilda 37,2 foizga oshgan.
Dunyo bo‘ylab har kuni 140 nafar xotin-qiz, ya’ni har 10 daqiqada bir nafardan ayol oiladagi zo‘ravonlik oqibatida vafot etadi. Bu haqda BMT Ayollar tashkiloti va BMTning Narkotiklar va jinoyatchilik bo‘yicha boshqarmasi (UNODC) tomonidan 2024-yil 25-noyabrda e’lon qilingan bayonotida keltirilgan.
“Ayollarga nisbatan zo‘ravonlik keng tarqalganligicha qolmoqda, shu jumladan uning eng qaltis ko‘rinishlarida”, deya ogohlantirmoqda BMT.
Ijtimoiy himoya milliy agentligi direktori birinchi o‘rinbosari Shahnoza Mirziyoyevaning bildirishicha, zo‘ravonliksiz dunyo xayoldagi orzu emas, bu birgalikda erishsa bo‘ladigan maqsaddir. O‘zbekistonda har bir ayol, har bir qiz hayoti qadrli bo‘lishi uchun kurashilmoqda.
Izoh (0)