Qirg‘iziston Din ishlari bo‘yicha davlat komissiyasi mamlakatda davlat idoralari va jamoat joylarida fuqaroning shaxsini aniqlashga imkon bermaydigan kiyim-kechaklarni kiyishni taqiqlashni taklif qilmoqda.
Ma’lum bo‘lishicha, ish va rasmiy faoliyat bilan bog‘liq kiyimlar, shuningdek, tibbiy sabablarga ko‘ra yuzni yopish bundan mustasno. Taqiqni buzganlar 20 ming qirg‘iz so‘mi (taxminan 3 mln so‘m) jarimaga tortilishi mumkin. Qaror loyihasi jamoatchilik muhokamasiga taqdim etilgan.
Shuningdek, jamoat joylarida, turar joy binolariga, davlat va munitsipal tashkilotlarga, maktabgacha ta’lim va umumta’lim muassasalariga borish orqali diniy adabiyotlar va boshqa diniy bosma, audio va video materiallarni tarqatishni taqiqlash taklifi ham ilgari surilmoqda.
Bundan tashqari, din ishlari bo‘yicha vakolatli davlat organi bilan kelishilmagan holda keksalar va nogironlar uylarida, jazoni o‘tash muassasalarida, tergov hibsxonalarida, shuningdek Qurolli Kuchlarning qo‘shin, qism va bo‘linmalarida diniy marosimlar, yig‘ilishlar va boshqa diniy tadbirlarni o‘tkazish uchun din arboblari, xorijiy diniy tashkilotlarning voizlarini taklif qilishga chek qo‘yilishi mumkin.
Diniy tashkilotlar yoki ularning vakillarining davlat hokimiyati va boshqaruvi organlari, mahalliy davlat hokimiyati organlari hamda ularning mansabdor shaxslari faoliyatiga aralashuvi ham taqiqlanadi va jarima bilan jazolanadi.
Bundan tashqari, siyosiy partiyalar faoliyatini diniy faoliyat subyektlari tomonidan moliyalashtirishni taqiqlash taklif etilmoqda.
Izoh (0)