Qirg‘izistonning Jalolobod viloyati Ichki ishlar boshqarmasi tomonidan mahalliy fuqaroni ko‘pxotinlilikda gumon qilib qo‘zg‘atilgan jinoyat ishi to‘xtatildi. Bu haqda Kloop xabar berdi.
Militsiya xabariga ko‘ra, bunday qaror jinoyat tarkibi yo‘qligi tufayli qabul qilingan. Ma’lum bo‘lishicha, gumonlanuvchining turmush o‘rtoqlari turli manzillarda yashaydi.
Qonunga binoan, “erkakning umumiy uy xo‘jaligida ikki yoki undan ortiq ayol bilan birga yashashi” ko‘pxotinlilik yoki ikki xotinlilik deb tan olinadi hamda jamoat yoki axloq tuzatish ishlari yoki jarima bilan jazolanadi.
Huquq himoyachisi Muxayo Abdraupovaning so‘zlariga ko‘ra, tergovchilar “ikkixotinlilik yoki ko‘pxotinlilik” moddasini noto‘g‘ri talqin qilmoqda.
“Militsiya erkaklarning ikki yoki undan ortiq ayolga uylanib, lekin ular turli manzillarda yashaydigan holatlarni ko‘rib chiqmaydi. Mening amaliyotimda bunday holatlar ham mavjud. Ular dalil sifatida ‘umumiy uy xo‘jaligini’ keltirmoqda. Ammo bu noto‘g‘ri. Moddada qarama-qarshiliklar mavjud”, — dedi u.
Eslatib o‘tamiz, iyun oyi boshida ijtimoiy tarmoqlarda “Men kundoshimga emas, singlimga baxt tilayman” nomli video tarqaldi. Videoda Jalolobod viloyati Suzoq tumanida yashovchi ayol eriga ikkinchi xotin olib bergani aks etgan.
Ma’lum bo‘lishicha, suzoqlik erkak ikkinchi xotinga uylanib, birinchi turmushidan bo‘lgan bolalari va birinchi ayoli ishtirokida to‘y o‘tkazgan. Bunga javoban Suzoq tumani Ichki ishlar bo‘limi (IIB) “ko‘pxotinlilik” moddasi bo‘yicha sudgacha bo‘lgan tergov ishlarini boshlagan.
Qirg‘izistonda ko‘pxotinlilik taqiqlangan. Ilgari Jinoyat kodeksida ko‘pxotinlilik uchun ikki yilgacha ozodlikdan mahrum qilish ko‘zda tutilgan edi. Biroq 2017-yilda kiritilgan o‘zgartirishlarga ko‘ra, ushbu jazo jarima bilan almashtirilgan.
Izoh (0)