Ғарб ва араб оммавий ахборот воситалари хабар беришича, Миср АҚШга Ғазо аҳолисини кўчириш бўйича ўз муқобил режасини таклиф этмоқчи.
Қоҳира президент Дональд Трампнинг фаластинликларни анклавдан ташқарига кўчириш ва уни сайёҳлик масканига айлантириш ташаббусига қатъиян қарши чиқди. Шимолий Африка мамлакати қочқинларнинг чиқиб кетиши Исроил билан тузилган тинчлик шартномасига зарба бўлишидан огоҳлантирди.
Миср ўз ҳудудига ҲАМАС аъзоларининг кириб келишидан хавотирда, чунки улар Синай ярим оролини яҳудий давлатига қарши янги уруш учун таянч нуқтасига айлантириши мумкин, дейилади хабарда.
AP манбаларига кўра, Миср ҳукумати Ғазо аҳолисининг тарқалиб кетишига йўл қўймаслик учун дипломатик кампания бошлаган. Уларнинг сўзларига кўра, Қоҳира Трамп маъмуриятини фаластинликларни Араб Республикасига кўчириш режаси 1979 йилги Миср–Исроил тинчлик шартномасига путур етказиши мумкинлиги ҳақида хабардор қилган. Бундай мактуб Пентагон, Давлат департаменти ва Конгрессга юборилган. AP суҳбатдошларининг аниқлик киритишича, бир вақтнинг ўзида Биньямин Нетаньяху бошчилигидаги Исроил ҳукумати ва бир қатор Ғарб давлатлари, жумладан, Буюк Британия, Франция ва Германияга ҳам худди шундай сигнал келган.
Қатарнинг Тhе Middle East Eе портали манбаларининг таъкидлашича, Трампнинг Ғазо бўйича ташаббуси Миср расмийларини ҳайратда қолдирган. Мисрдаги баъзи расмийлар бундай режанинг ички сиёсий хатарлари, жумладан, “эҳтимолий тўнтариш” ҳақида очиқ гапира бошлаган.
Қоҳирага фаластинлик қочқинларни қабул қилиш таклифи илгари ҳам, 2023 йил 7 октябрда Исроил ва ҲАМАС ўртасида бошланган кенг кўламли можаронинг дастлабки кунларидаёқ берилган эди, деб таъкидлайди AP.
Бироқ бундай сценарийлар ошкора муҳокама қилинмаган.
Аммо Al-Araby Аl-Jadeed портали манбаларига кўра, АҚШнинг амалдаги ҳукумати Қоҳирага кучли дипломатик босим ўтказмоқда. Уларнинг тахминига кўра, Миср раҳбарияти Форс кўрфази мамлакатлари каби минтақадаги бошқа, янада таъсирли ўйинчиларнинг ёрдамисиз Трампнинг шов-шувли ташаббусига қарши туришда жиддий қийинчиликларга дуч келади.
Изоҳ (0)