AQSH prezidenti Donald Tramp Iordaniya, Misr va boshqa arab davlatlarini G‘azo sektoridan qabul qilayotgan falastinlik qochqinlar sonini ko‘paytirishga chaqirdi. Bu haqda Associated Press xabar berdi.
Tramp fikricha, urushdan xarob bo‘lgan hududni “tozalash” uchun aholining yetarli qismini ko‘chirish kerak. U buni Iordaniya qiroli Abdulla II bilan telefon orqali muloqotda muhokama qilganini aytdi. 26-yanvar kuni esa Misr prezidenti Abdulfattoh as-Sissi bilan ham shu mavzuda gaplashmoqchi.
Men u odamlarni qabul qilishini xohlardim. Misr ularni qabul qilishini istardim. Ehtimol, 1,5 million kishi haqida gap ketyapti. Biz shunchaki tartib o‘rnatib, hammasi ortda qoldi, deymiz, dedi u.
Shu bilan birga, u Iordaniya qirolini ko‘plab falastinlik qochqinlarni qabul qilgani uchun maqtadi.
Biror narsa bo‘lishi kerak. Ammo hozir bu tom ma’noda vayronalar makoni. Deyarli hamma narsa vayron qilingan, odamlar o‘lib ketyapti, deya Tramp G‘azo sektoridagi hozirgi vaziyatni nazarda tutdi.
U bu vaziyatda falastinlik qochqinlarga G‘azo tashqarisida uy-joy qurish uchun ba’zi arab davlatlari bilan hamkorlikni afzal ko‘rishini aytdi.
Tramp Isroilga bombalar yuborishni tikladi
U Baydenning Isroilga 2000 funtlik bombalarni yuborish bo‘yicha joriy etgan taqiqini bekor qildi. Bu Isroil va HAMAS o‘rtasidagi urush paytida tinch aholi qurbonlari sonini kamaytirishga qaratilgan bosimni yo‘qqa chiqaradi. AQSH prezidenti taqiqni bekor qilish qarorini quyidagicha izohlamoqda:
Ular bombalarni uzoq vaqtdan beri kutishayotgan edi. Chunki ularni sotib olishgan, deb javob berdi siyosatchi.
HAMAS munosabati
Falastinning HAMAS harakati G‘azodagilarni ko‘chirish taklifiga javoban arab davlatlariga murojaat qildi.
Biz barcha arab va islom davlatlarini, ayniqsa, Misr va Iordaniyani falastinliklarning o‘z yerlaridan majburan ko‘chirilishini rad etishdan iborat qat’iy pozitsiyasini yana bir bor bildirishga chaqiramiz, deyiladi HAMAS bayonotida.
Harakat, shuningdek, yangi Amerika ma’muriyatidan bunday takliflarni ilgari surishni to‘xtatishni talab qildi, chunki bu faqat Isroil manfaatlariga xizmat qilishi ta‘kidlandi. Buning o‘rniga, falastinliklarning barcha huquqlarini, shu jumladan, poytaxti Quddus bo‘lgan mustaqil davlat qurish huquqini amalga oshirishlari uchun ishlashni talab etdi. Hozircha Misr va Iordaniya Trampning taklifiga munosabat bildirmadi.
Izoh (0)