6-fevral kuni Qutb doirasidan janubda, Alyaskadagi Norton Saund ko‘rfazi ustidan uchib o‘tayotgan, bortida o‘n kishi bo‘lgan samolyot radarlardan g‘oyib bo‘ldi. Qutqaruvchilar tun yarmigacha qidiruv ishlarini davom ettirgan.
Alyaska jamoat xavfsizligi departamentining ma’lum qilishicha, Bering Air aviakompaniyasiga tegishli samolyot Unalaklitdan Nomga yo‘l olgan. Bortda to‘qqiz nafar yo‘lovchi va uchuvchi bo‘lgan. Hozirda mas’ul idoralar samolyotning so‘nggi ma’lum koordinatalarini aniqlashga urinmoqda.
Unalaklit — Alyaskaning g‘arbiy qismidagi aholi punkti bo‘lib, u Nomdan 240 kilometr janubi-sharqda va Ankorijdan 640 kilometr shimoli-g‘arbda joylashgan. Bu yerda taxminan 690 kishi istiqomat qiladi.
Bering Air aviakompaniyasining ekspluatatsiya bo‘yicha direktori Devid Olsonning aytishicha, Cessna Caravan samolyoti Unalaklitdan soat 14:37 da uchgan va bir soatdan kamroq vaqt o‘tgach u bilan aloqa uzilgan. AQSH qirg‘oq qo‘riqlash xizmati ma’lumotlariga ko‘ra, samolyot qirg‘oqdan 19 kilometr uzoqlikda bo‘lgan.
Bering Air Alyaskaning g‘arbiy qismidagi 32 ta aholi punktiga Nom, Kozebu va Unalaklitdagi markazlaridan xizmat ko‘rsatadi. Ko‘pchilik yo‘nalishlarga dushanbadan shanbagacha kuniga ikki marta muntazam reyslar amalga oshiriladi.
Nomning o‘t o‘chirish xizmati ijtimoiy tarmoqlarda xabar berishicha, quruqlikdagi guruhlar Nom shahridan Topkokkacha bo‘lgan qirg‘oq bo‘ylab qidiruv ishlarini olib bormoqda.
Ob-havo sharoiti va ko‘rishning yomonligi sababli havodan qidiruv ishlarini olib borish imkoniyati cheklangan, deyiladi xabarda.
Aholiga ob-havo sharoiti juda xavfli bo‘lgani uchun mustaqil qidiruv guruhlari tuzmaslik tavsiya etildi. AQSH qirg‘oq qo‘riqlash xizmati samolyoti ekipaji yo‘qolgan kemaning so‘nggi ma’lum koordinatalari atrofida qidiruv ishlarini olib borishi kutilmoqda.
Milliy meteorologiya xizmati ma’lumotlariga ko‘ra, uchish vaqtida Unalaklitda harorat -8,3 daraja sovuq bo‘lgan. Kuchsiz qor yog‘ib, tuman kuzatilgan.
Samolyot bortida bo‘lganlarning ismlari hozircha oshkor etilmayapti.
Bu AQSHda so‘nggi kunlarda sodir bo‘lgan uchinchi yirik aviahalokat hisoblanadi. Joriy yilning 29-yanvar kuni mamlakat poytaxti yaqinida yo‘lovchi samolyoti va harbiy vertolyot havoda to‘qnashishi oqibatida 67 kishi halok bo‘ldi. Ikki kundan so‘ng, 31-yanvar kuni Filadelfiyada tibbiy transport samolyoti halokatga uchradi, oqibatda bortdagi olti kishi va yerdagi bir kishi halok bo‘ldi.
Izoh (0)