Vashingtondagi Potomak daryosi ustida halokatga uchragan samolyot va vertolyotning kuzatuv kameradan olingan videosi CNN telekanaliga sizdirilgani uchun Vashington aeroportlari boshqarmasining ikki xodimi hibsga olindi. Bu haqida ABC telekanali xabar bermoqda.
“Vashingtondagi aeroportning ikki nafar xodimi samolyot va vertolyotning to‘qnashuvi aks etgan videoni CNN telekanaliga taqdim etgani uchun hibsga olindi”, deyiladi telekanal xabarida.
Telekanal maʼlumotlariga ko‘ra, ular aeroport kuzatuv kameralaridagi videoyozuvlarni ruxsatsiz ko‘chirib olishda ayblangan.
30-yanvar kuni Vashingtondagi Ronald Reygan aeroportida American Airlines Bombardier CRJ700 mintaqaviy yo‘lovchi samolyoti qo‘nish vaqtida Sikorsky H-60 (Black Hawk) harbiy vertolyoti bilan to‘qnashib ketgan edi.
Layner bortida 60 nafar yo‘lovchi va to‘rt nafar ekipaj a’zosi, vertolyot bortida esa uch kishi bo‘lgan. Bu AQSHda ro‘y bergan so‘nggi 15 yildagi eng yirik aviahalokat bo‘ldi.
AQSH prezidenti Donald Tramp samolyot halokatidan omon qolganlar yo‘qligini aytdi. Fuqarolik layneri yo‘lovchilari orasida AQSHning figurali uchish jamoasi a’zolari ham bo‘lgan.
Prezident Shavkat Mirziyoyev Vashington shahridagi Ronald Reygan nomidagi aeroport hududida yuz bergan fojiali aviahalokat oqibatida ko‘plab insonlar halok bo‘lgani munosabati bilan Amerika Qo‘shma Shtatlari prezidenti Donald Trampga taʼziya maktubi yo‘lladi.
Izoh (0)