Vashingtondagi Ronald Reygan nomidagi aeroportda American Airlines yo‘lovchi samolyoti Black Hawk harbiy vertolyoti bilan to‘qnashgan kuni dispetcherlar yetishmovchiligi kuzatilgan. Bu haqda The New York Times gazetasi AQSH Fuqaro aviatsiyasi federal boshqarmasining dastlabki hisobotiga asoslanib xabar berdi.
Hujjatdan ma’lum bo‘lishicha, navbatchi aviadispetcher hodisa kuni odatda ikki xodim bajaradigan vazifani yolg‘iz o‘zi amalga oshirgan. NYT’ning qo‘shimcha qilishicha, yo‘lovchi samolyotining harbiy vertolyot bilan to‘qnashuvi vertolyot belgilangan balandlikdan yuqoriroq parvoz qilgani sababli yuz bergan.
Halokat oqibatida 67 kishi, samolyot va vertolyotdagi barcha yo‘lovchilar halok bo‘lgan.
OAV xabar qilishicha, American Airlines samolyotida 1994-yilgi figurali uchish bo‘yicha jahon chempionlari Yevgeniya Shishkova va Vadim Naumov, shuningdek, juftlikda uchish bo‘yicha SSSR chempionatining bronza medali sovrindori Inna Volyanskaya bo‘lgan. Bugun yo‘lovchilar orasida sobiq figurali uchuvchi Aleksandr Kirsanov ham bo‘lgani ma’lum bo‘ldi. Sportchining vafot etgani haqida uning rafiqasi Natalya Gudina ABC telekanaliga ma’lum qilgan.
American Airlines yo‘lovchi samolyoti va Black Hawk harbiy vertolyoti 29-yanvar kuni kechqurun Vashington osmonida to‘qnashgan edi. Halokat oqibatida ikkala havo kemasining parchalari Potomak daryosiga qulab tushgan.
31-yanvar kuni ertalab suv osti qidiruv guruhlari daryo tubidan yo‘lovchi samolyotining qora qutilarini topib, ekspertizaga yuborgani ma’lum qilindi.
Izoh (0)