Joriy yil 25-dekabr kuni Bokudan Grozniyga uchayotgan Embraer 190 yo‘lovchi samolyoti Qozog‘istonning Oqtov shahrida qulab tushdi. Bu dahshatli fojia sabablarini o‘rganish hali ham davom etayotgan bo‘lsa-da, mazkur aviahalokat hattoki eng ishonchli transport turlaridan biri bo‘lgan samolyotda ham xavfsizlik masalasi juda muhim ekanligini yodga soldi.
Afsuski, yo‘lovchilar samolyot bortida yoki ish tizimida biror kor hol yuzaga kelishining oldini ololmaydi, ammo samolyotda eng xavfsiz o‘rindiqlarni tanlash orqali o‘lim xavfini kamaytirish imkoniga ega bo‘ladi. Quyida Travel Leisure maʼlumotlariga asoslanib samolyot xavfsizlik qoidalari haqida maʼlumot beramiz.
Samolyotning qaysi qismi xavfsizroq?
Mutaxassislarning fikricha, bortdagi eng xavfsiz joy samolyotning orqa tomondagi uchdan bir qismidir. AQSH Fuqarolik Aviatsiya boshqarmasi (FAA) ning 35 yillik maʼlumotlariga asoslangan tadqiqotga ko‘ra, ushbu qismdagi o‘lim xavfi 32 foizni tashkil etadi. Taqqoslash uchun, o‘rta qismda bu ko‘rsatkich 38 foizga, old qismida esa 39 foizga oshadi.
Samolyot orqa tomoni, uchdan bir qismidagi eng markaziy o‘rindiqlar xavfsizlik jihatdan alohida ajralib turadi (to‘q yashil rangda belgilangan) Bu tomonda o‘lim ko‘rsatkichi o‘rtacha 28 foizni tashkil qiladi. Samolyotning o‘rta qismdagi o‘rindiqlar esa eng xavfli deb topildi, ularning o‘limga olib kelish xavfi o‘rtacha 44 foizdir.
Samolyot bortida omon qolish imkoniyatini oshirishning yana bir varianti bor: buning uchun favqulodda chiqish joyi yaqinidagi o‘rindiqlarni tanlash kerak. Qoidaga ko‘ra, favqulodda hodisalarda samolyot 90 soniya ichida to‘liq evakuatsiya qilinishi kerak. 100 dan ortiq aviahalokatlar tahlili ushbu maʼlumotni tasdiqlaydi.
Istisno holatlar
Barcha statistik maʼlumotlar shu vaqtgacha bo‘lib o‘tgan voqealar haqidagi maʼlumotlar asosida umumlashtiradi, lekin istisno vaziyatlar ham mavjud. Masalan, 1989-yilda United Airlines 232 reysi halokatga uchraganida, tirik qolganlarning aksariyati samolyotning o‘rta qismida bo‘lgan:
1977-yilda Tenerife fojiasida 61 nafar tirik qolganlar asosan old o‘rindiqlarda bo‘lgan. Bunday misollar favqulodda vaziyatlar doimo farq qilishi mumkinligini bildiradi.
Xavfsizlik bo‘yicha tavsiyalar
Parvoz paytida xavfsizlikni taʼminlash uchun quyidagi oddiy tavsiyalarga amal qilish lozim:
- Styuardessalarning barcha ko‘rsatmalarini doimo diqqat bilan tinglang va evakuatsiya paytida hech qachon buyumlaringizni olishga urinmang. Halokat paytida asosiy maqsad samolyotni imkon qadar tezroq tark etishdir;
- Old o‘rindiq cho‘ntagida joylashgan xavfsizlik haqidagi qo‘llanmani oldindan o‘qib chiqing;
- Favqulodda hodisada chiroqlar o‘chishi mumkin, shu sababli chiqish eshigidan to o‘rindiqqacha nechta qator borligini avvaldan sanab qo‘ying.
Izoh (0)