Vashington Eron Ibrohim Raisiyning o‘limida AQSH va Isroilni ayblashi mumkinligidan xavotirda. Bu haqda AQSH prezidenti Jo Bayden administratsiyasining uch nafar yuqori martabali vakiliga tayanib, Politico xabar berdi.
Ularning so‘zlariga ko‘ra, amerikalik rasmiylar Raisiy bo‘lgan vertolyot “qattiq qo‘ngani” haqidagi xabarlardan keyin qidiruv ishlarini diqqat bilan kuzatgan. Aviahalokat Yaqin Sharqdagi dinamikani qanday o‘zgartirishi mumkinligi muhokama qilingan.
Garchi dastlabki razvedka ma’lumotlari halokatga yomon ob-havo sabab bo‘lganini ko‘rsatsa-da, amerikalik rasmiylar Tehron Isroil va AQSHni sabotajda ayblashidan xavotirlangan.
Bir muddat bu Uchinchi jahon urushining boshlanishi bo‘ladimi, degan savol absurd tuyilmaydigan bo‘ldi. AQSH mulozimlari Eron rasmiylari inson omili yoki eski vertolyotdan foydalanish tufayli mamlakat prezidenti xavfsizligini yetarli darajada ta’minlay olmaganliklarini tan olishlariga shubha qilgan. Biroq Eron aybni boshqalarga yuklamas ekan, kengroq mintaqaviy mojaro ehtimoli pastligicha qolmoqda, — dedi Politico manbalari.
IRNA xabariga ko‘ra, Raisiy taxminan 50 yil avval Amerikada ishlab chiqarilgan Bell 212 vertolyotida parvoz qilgan. Pentagon rahbari Lloyd Ostin 20-may kuni bo‘lib o‘tgan matbuot anjumanida “Qo‘shma Shtatlarning bu falokatga hech qanday aloqasi yo‘q” ekanini ta’kidladi.
Biz vaziyatni kuzatishda davom etmoqdamiz, ammo hozircha avariya sabablari haqida hech qanday ma’lumotga ega emasmiz, — degan u.
AQSH davlat departamenti matbuot kotibi Metyu Millerning aytishicha, Eron hukumati halokatga uchragan vertolyotni topishda AQSHdan yordam so‘ragan. Vashington bunga tayyorligini bildirgan.
Oxir-oqibat, asosan logistika sabablarga ko‘ra, bu yordamni taqdim eta olmadik, —deydi u.
Eslatib o‘tamiz, 19-may kuni Eron prezidenti Ibrohim Raisiy aviahalokat natijasida halok bo‘ldi. Mamlakat shimoli-g‘arbida Eron prezidenti va tashqi ishlar vaziri bo‘lgan vertolyot halokatga uchragandi.
Kuchli tuman va tog‘li hudud tufayli halokatga uchragan vertolyotni qidirish 10 soatdan ortiq davom etgan. Mutaxassislar fikricha, falokat texnik nosozlik yoki inson omili tufayli yuz bergan bo‘lishi mumkin. Raisiy vafoti munosabati bilan Eronda besh kunlik motam e’lon qilingan. Eron prezidentining dafn marosimi 23-may kuni Mashhad shahrida bo‘lib o‘tadi. Muddatidan oldin prezidentlik saylovlari 28-iyunga belgilangan.
Izoh (0)