Eron prezidenti Ibrohim Raisiy 19-may kuni yuz bergan aviahalokat oqibatida halok bo‘ldi. Ma’lumotni Eron Qizil yarim oy jamiyati rahbari Husayn Kolivand tasdiqladi. Mehr axborot agentligi ham prezident shahid ketganini e’lon qildi.
Prezident vertolyoti 19-may kuni Eron-Ozarbayjon chegarasi yaqinidagi Verzegan shahri tog‘li hududiga “qattiq qo‘ngan”di. Qutqaruvchilar 20-may kuni vertolyot halokatga uchragan joyni aniqlagan. Ma’lum bo‘lishicha, vertolyot “qattiq qo‘nish” chog‘ida butunlay yonib ketgan. Bortda uchuvchilardan tashqari Eron prezidenti Ibrohim Raisiy, tashqi ishlar vaziri Amir Abdullahyon, Sharqiy Ozarbayjon gubernatori Oyatulloh al-Hoshim va Tabriz imomi Muhammad Ali al-Hoshim bo‘lgan.
Aviahalokat oldidan Ibrohim Raisiy Ozarbayjon rahbari Ilhom Aliyev bilan uchrashuvdan qaytayotgan edi. Davlat rahbarlari Aras daryosidagi to‘g‘on ochilishi marosimida ishtirok etgan.
“Halokatga uchragan vertolyotning joylashuvi aniqlangach, bortdagilar tirik qolgani haqida hech qanday alomat topmadi”, — dedi Eron Qizil yarim oy jamiyati Pir Husayn Kolivand.
Eron prezidenti vafot etgan taqdirda, oliy rahnamo Xomanaiyning roziligi bilan uning vakolatlarini birinchi vitse-prezident Muhammad Moxber o‘z zimmasiga olishi aytilgandi. Eronda yangi prezidentlik saylovlari 50 kun ichida o‘tkazilishi kerak bo‘ladi.
Izoh (0)