O‘FA futbolchilarning maqomi va o‘tishi bo‘yicha qo‘mitasi tomonidan “Navbahor lochinlari”, “Neftchi”, “So‘g‘diyona”, “Jizzax Zvezda Bo‘ston” futbol klublarining murabbiylar, futbolchilar va xodimlar oldidagi qarzdorligini bartaraf etishi uchun muddat belgilandi. Bu haqda O‘FA matbuot xizmati xabar berdi.
Maʼlum qilinishicha, baʼzi klublarda shartnoma shartlarini buzish, maoshlar to‘lovini kechiktirish bilan bog‘liq vaziyatlar uchrab turibdi.
Bunday holatlarni bartaraf etish, FIFA tomonidan jiddiy choralar ko‘rilishining oldini olish maqsadida Futbolchilarning maqomi va o‘tishi bo‘yicha qo‘mita yig‘ilishi bo‘lib o‘tdi.
Unda O‘zbekiston futbolchilar uyushmasi, futbolchilar, murabbiylar va boshqa mutaxassislarning murojaatlari asosida “Navbahor lochinlari”, “Neftchi”, “So‘g‘diyona”, “Jizzax Zvezda Bo‘ston” futbol klublarining ish haqi va boshqa to‘lovlar bo‘yicha qarzdorligi masalasi ko‘rib chiqildi.
“Navbahor lochinlari” futbol klubi murabbiylar, asosiy jamoa, futzal jamoasi va ayollar jamoasi futbolchilari oldida qarzdorligi mavjudligi aniqlandi. “Neftchi” futbol klubining asosiy jamoa va ayollar jamoasi aʼzolari oldida, shuningdek, “So‘g‘diyona” futbol klubining ayollar jamoasi aʼzolaridan hamda “Lokomotiv” futbol klubidan transfer shartnomasi bilan bog‘liq qarzdorligi mavjudligi aniqlandi.
Bundan tashqari, Birinchi liga musobaqasida qatnashuvchi “Jizzax Zvezda Bo‘ston” futbol klubi ham futbolchilariga bir necha oydan buyon ish haqi va boshqa to‘lovlarni to‘lamasdan kelayotgani maʼlum bo‘ldi.
Futbolchilarning maqomi va o‘tishi bo‘yicha qo‘mitasi tomonidan qayd etilgan qarzdorliklarni 14-fevral kuniga qadar bartaraf etish yuzasidan muddat belgilandi.
Mazkur qarzdorliklar belgilangan muddatda bartaraf etilmagan taqdirda tegishli futbol klubiga nisbatan jiddiyroq choralar qo‘llanishi to‘g‘risida ogohlantirildi.
Izoh (0)