“Xorazm” klubi 16-jamoa sifatida 2025-yilgi O‘zbekiston Superligasida qatnashadigan bo‘ldi.
Klub bosh homiysi 2025-yilgi xarajatlar smetasini tasdiqladi va smeta O‘FA ro‘yxatidan o‘tkazildi. Shuningdek, Xorazm viloyati hokimi Jo‘rabek Rahimov klubni Superligada qo‘llab-quvvatlash yuzasidan rasmiy kafolat berdi.
“Xorazm” so‘nggi bor 2010-yilgi mavsumni elitada o‘tkazgan bo‘lib, shundan buyon nufuzi jihatdan ikkinchi raqamli ligada ishtirok etib kelayotgandi. Klub o‘tgan mavsumni Proligada 6-o‘rinda yakunlagan bo‘lsa-da, OFK litsenziyasiga ega chiqqan. Mazkur harakat jamoaga Superliga eshiklarini ochdi.
Avvalroq xabar qilinganidek, “Xorazm”dagi stadion Superliga talablariga javob bermasligidan kelib chiqib, klub elitadagi raqiblarini neytral maydonda qabul qiladi. Ayni vaqtda Xorazmdagi stadion chimi qanday turda bo‘lishi masalasi O‘FA bilan muhokama qilinmoqda. Bu masalada qanday kelishuvga erishilgani va “Xorazm” unga qadar qaysi stadiondan foydalanishi masalasida keyinroq xabar beriladi, deb yozadi PFL matbuot xizmati.
Avvalroq “Metallurg” va “Olimpik” Superliganing 16-jamoasi bo‘lish imkoniyatidan voz kechgandi. “Xorazm” esa Liga tomonidan belgilangan dedlayn davomida talabni bajarishga erishdi.
Izoh (0)