Timur Kapadze O‘zbekiston milliy terma jamoasi bosh murabbiyi etib tayinlandi, deb xabar bermoqda O‘FA.
O‘zbekiston futbol assotsiatsiyasi milliy terma jamoa bosh murabbiyligi uchun bir qator nomzodlarni o‘rganib chiqdi va tahlil qildi. Mahalliy va xorijlik tajribali mutaxassislar bilan muzokaralar o‘tkazdi. Shu bilan birga, murabbiylar kengashi tomonidan taqdim etilgan tavsiyalar ham batafsil ko‘rib chiqildi.
“Jahon chempionati saralashining hal qiluvchi o‘yinlariga oz vaqt qolganini hisobga olib, jamoa va futbolchilar bilan yaqindan tanish bo‘lgan, uzoq yillar davomida milliy terma jamoa safida to‘p surgan hamda bosh murabbiy va yordamchi murabbiy sifatida faoliyat olib borgan, shuningdek, O‘zbekiston Olimpiya terma jamoasi bilan tarixiy natijaga erishgan Timur Kapadze nomzodi ilgari surildi. Hozirgi yuzaga kelgan holatda O‘FA aynan Kapadzening murabbiylik isteʼdodi, masʼuliyati, jamoa aʼzolari orasida mavqei, qolaversa doimo yuqori maqsad sari intilish kabi jihatlari orqali muhim uchrashuarda ijobiy natija ko‘rsatishiga ishonadi”, – deyiladi xabarda.
Ayni kunlarda O‘zbekiston milliy terma jamoasi Qatarda yig‘in o‘tkazmoqda. Timur Kapadze ushbu yig‘inga qo‘shilib, jamoa boshqaruvini qo‘lga oladi.
Avvalroq Srechko Katanes sog‘lig‘i bilan bog‘liq muammolar sababli O‘zbekiston milliy terma jamoasi bosh murabbiyligidan ketgandi.
Maʼlumot uchun, Katanes qo‘l ostida O‘zbekiston terma jamoasi Jahon chempionatiga saralash bosqichida 6 turdan keyin 13 ochko bilan ikkinchi o‘rinda bormoqda. Guruhda 1 va 2-o‘rinlarni olgan jamoalar mundialga to‘g‘ridan to‘g‘ri yo‘llanmani qo‘lga kiritadi.
Izoh (1)
YAXSHI OMAD