Xalqaro sport arbitraj sudi (CAS) “Bunyodkor”ning Javlon Ibrohimovdan qarzdorligi masalasi bo‘yicha klub taqdim etgan arznomani qanoatlantirmadi. Bu haqda PFL matbuot xizmati ma’lum qildi.
Qayd etilishicha, 2020-yilning dekabr oyida Ibrohimov O‘FA Futbolchilar maqomi va o‘tishi bo‘yicha qo‘mitasiga arz kiritgan. Unda klub futbolchi oldidagi moliyaviy majburiyatini to‘liq bajarmagani da’vo qilingan. Qo‘mita ishni o‘rganib, “Bunyodkor” futbol oldidagi qarzni to‘lashi lozimligi borasida qaror chiqaradi.
Biroq “Bunyodkor” ushbu qarordan norozi bo‘lib, O‘FA Apellyatsiya qo‘mitasiga shikoyat kiritadi. 2021-yilning 25-may kuni Apellyatsiya qo‘mitasi ham futbolchini haq deb hisoblab, qarorni o‘zi kuchida qoldirdi.
Har ikki ishni boy bergan Toshkent klubi 2021-yilning 14-iyun sanasida Xalqaro sport arbitraj sudiga murojaat qiladi. CAS ushbu masala yuzasidan 25-aprel kuni qaror chiqardi. Unga ko‘ra, tashkilot O‘FA Apellyatsiya qo‘mitasining 2021-yil 25-maydagi qarorini o‘z kuchida qoldirish yuzasidan qaror chiqargan
Endilikda “Bunyodkor” sobiq futbolchisi Javlon Ibrohimov oldidagi qarzlarini to‘lab berishi kerak bo‘ladi. Qo‘shimchasiga, “Bunyodkor” uzoq davom etgan jarayon uchun sud xarajatlarini ham to‘liq qoplashi talab etiladi. PFL bayonotida qayd etilishicha, sud xarajatlari Ibrohimovga avval boshidan to‘lanishi lozim bo‘lgan miqdordan kam emas.
Izoh (0)