Dubayda Checheniston rahbari Ramzan Qodirov oilasiga tegishli to‘rtta villa aniqlandi, deb yozmoqda “Vajniye istorii” nashri.
Checheniston rahbarining ammavachchasi Shahruddi Edilgiriyev Dubayda umumiy qiymati 20 million dollardan oshiq bo‘lgan to‘rtta hashamatli uyga egalik qilmoqda.
Bu Birlashgan Arab Amirliklarining (BAA) eng yirik shahrida ko‘chmas mulk haqidagi ma’lumotlar tarqalishi tufayli ma’lum bo‘ldi, deyiladi xabarda.
Jurnalistlar qo‘lga kiritgan ma’lumotlarga ko‘ra, Edilgiriyev birinchi villani 2022-yil dekabr oyida Zabeel Investment qurilish kompaniyasidan sotib olgan. Palm-Jumeyra sun’iy orolidagi 1026 kvadrat metrlik ko‘chmas mulk unga 53 million dirham yoki 14,4 million dollarga tushgan. Bu usmoniylar uslubidagi besh xonali uy — Zabeel Saray mehmonxona majmuasi hududida joylashgan “Qirollik villalari”dan biri hisoblanadi.
Edilgiriyev uyni sotib olishidan oldin bu villa “hashamat, qulaylik va eksklyuziv yolg‘izlik” izlayotgan mehmonlarga ijaraga berilgan. “Ukrainskaya pravda” nashrining avvalgi tadqiqotida yozilishicha, Qodirov bu villadan taxminan 2014-yildan beri Chechenistonning “norasmiy elchixonasi” sifatida foydalanib kelgan.
Shu uyda Checheniston rahbarining arab va musulmon mamlakatlaridagi o‘sha paytdagi vakili, Qodirovning yana bir qarindoshi Turko Dovudov ham istiqomat qilgan. Qirollik birlashgan mudofaa tadqiqotlari instituti ma’ruzasida ta’kidlanishicha, aynan uning sa’y-harakatlari tufayli Yaqin Sharq davlatlari Ukrainadagi urush uchun Rossiyaga qarshi sanksiyalarga qo‘shilmagan.
2023-yil oktyabr oyida Edilgiriyev Dubayda yana uchta hashamatli villani xarid qilgan. Ular shaharning quruqlik qismida joylashgan bo‘lib, uylarning umumiy qiymati 6 million dollarga yaqin. Edilgiriyev – Qodirovning uchta ammavachchalarining eng kichigi. Ular ham Checheniston rahbari singari Sentoroy qishlog‘ida tug‘ilgan, ularning onasi Ramzanning otasi Ahmad Qodirovning tug‘ishgan singlisi. Aka-ukalarning eng kattasi Amrudi Edilgiriyev Checheniston hokimiyatida turli lavozimlarda ishlagan, hozirda esa respublikada masjidlar qurilishiga mas’ul hisoblanadi.
Der Spiegel nashrining ma’lumotlariga ko‘ra, o‘rtancha ukasi Paxrudi Edilgiriyev Qodirovning qo‘riqlash xizmatida ishlagan va inson huquqlari himoyachisi Muhammad Abdurahmonovga suiqasd uyushtirishga tayyorgarlik ko‘rish bo‘yicha Yevropa ittifoqi tomonidan qidiruvga berilgan.
Qodirovning BAA bilan aloqalari mustahkam. “Ukrainskaya pravda”ga ko‘ra, birgina 2021—2022-yillarda uning shaxsiy samolyoti BAAga kamida 14 marta parvoz qilgan. FlightRadar24 ma’lumotlariga ko‘ra, 2023—2024-yillarda Qodirovning samolyoti Dubay va uning atrofida kamida to‘rt marta bo‘lgan. Qodirov Rossiya prezidenti Vladimir Putinga BAAga rasmiy tashriflari chog‘ida bir necha bor hamrohlik qilgan, mamlakat prezidenti shayx Muhammad bin Zoid Ol Nahayonni esa “aziz birodar” deb atagan.
Izoh (0)