Giyohvandlik vositalarining noqonuniy aylanmasiga qarshi kurashish borasida huquqni muhofaza qiluvchi organlar tomonidan tezkor tadbirlar o‘tkazildi. Bu haqda O‘zA xabar berdi.
Maʼlum qilinishicha, Surxondaryo viloyatining Denov tumanida yashovchi fuqaro va uning Termiz shahrida istiqomat qiluvchi jinoiy sherigi 3 kg 849 gramm “opiy” moddasini Samarqand viloyatiga sotish maqsadida olib kelgan vaqtda ushlandi.
Tergovga qadar tekshiruv davomida aniqlanishicha, ushbu giyohvandlik vositasi muqaddam tojikistonlik narkokuryer tomonidan Denov tumani hududiga kontrabanda yo‘li bilan yetkazib berilgan.
Shuningdek, Namangan viloyatining Pop tumanida o‘tkazilgan tezkor tadbirda Toshkent — Namangan yo‘nalishida harakatlanayotgan, Chust tumanida yashovchi shaxs boshqaruvidagi Damas avtomashinasi to‘xtatilib, ko‘zdan kechirildi.
Natijada uning salon qismiga yashirib qo‘yilgan 2 kg 436 gramm “gashish” moddasi aniqlanib, protsessual tartibda rasmiylashtirib olindi.
U muqaddam tojikistonlik narkokuryerlar tomonidan aylanma yo‘llar orqali Toshkent viloyatining Ohangaron tumani hududiga olib kelinib, xufiya joyga qoldirib ketilgan ushbu giyohvandlik vositasini olib, qaytayotgan bo‘lgan.
Bundan tashqari, Namangan — Andijon yo‘nalishida harakatlangan Cobalt avtomashinasi Andijon shahrida to‘xtatilib, ko‘zdan kechirildi. Unda yo‘lovchi sifatida ketayotgan Qirg‘iz Respublikasi fuqarosi, muqaddam giyohvandlik vositalari savdosi bilan bog‘liq jinoyati uchun sudlangan shaxsga tegishli 1 kg 702 gramm “gashish” moddasi borligi aniqlanib, protsessual tartibda rasmiylashtirib olindi.
Tergovga qadar tekshiruv davomida, u Qirg‘iz Respublikasidan kontrabanda yo‘li bilan Namangan viloyatiga olib kelgan ushbu narkotik moddani Andijon shahrida sotishni rejalashtirganligi maʼlum bo‘ldi.
Hozirda mazkur shaxslarga nisbatan Jinoyat Kodeksining tegishli moddalari bilan jinoyat ishlari qo‘zg‘atilib, qamoq ehtiyot chorasi qo‘llanildi.
Giyohvand moddalar savdosi
2024-yilning mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)