Гиёҳвандлик воситаларининг ноқонуний айланмасига қарши курашиш борасида ҳуқуқни муҳофаза қилувчи органлар томонидан тезкор тадбирлар ўтказилди. Бу ҳақда ЎзА хабар берди.
Маълум қилинишича, Сурхондарё вилоятининг Денов туманида яшовчи фуқаро ва унинг Термиз шаҳрида истиқомат қилувчи жиноий шериги 3 кг 849 грамм “опий” моддасини Самарқанд вилоятига сотиш мақсадида олиб келган вақтда ушланди.
Терговга қадар текширув давомида аниқланишича, ушбу гиёҳвандлик воситаси муқаддам тожикистонлик наркокурер томонидан Денов тумани ҳудудига контрабанда йўли билан етказиб берилган.
Шунингдек, Наманган вилоятининг Поп туманида ўтказилган тезкор тадбирда Тошкент — Наманган йўналишида ҳаракатланаётган, Чуст туманида яшовчи шахс бошқарувидаги Damas автомашинаси тўхтатилиб, кўздан кечирилди.
Натижада унинг салон қисмига яшириб қўйилган 2 кг 436 грамм “гашиш” моддаси аниқланиб, процессуал тартибда расмийлаштириб олинди.
У муқаддам тожикистонлик наркокурерлар томонидан айланма йўллар орқали Тошкент вилоятининг Оҳангарон тумани ҳудудига олиб келиниб, хуфия жойга қолдириб кетилган ушбу гиёҳвандлик воситасини олиб, қайтаётган бўлган.
Бундан ташқари, Наманган — Андижон йўналишида ҳаракатланган Cobalt автомашинаси Андижон шаҳрида тўхтатилиб, кўздан кечирилди. Унда йўловчи сифатида кетаётган Қирғиз Республикаси фуқароси, муқаддам гиёҳвандлик воситалари савдоси билан боғлиқ жинояти учун судланган шахсга тегишли 1 кг 702 грамм “гашиш” моддаси борлиги аниқланиб, процессуал тартибда расмийлаштириб олинди.
Терговга қадар текширув давомида, у Қирғиз Республикасидан контрабанда йўли билан Наманган вилоятига олиб келган ушбу наркотик моддани Андижон шаҳрида сотишни режалаштирганлиги маълум бўлди.
Ҳозирда мазкур шахсларга нисбатан Жиноят Кодексининг тегишли моддалари билан жиноят ишлари қўзғатилиб, қамоқ эҳтиёт чораси қўлланилди.
Гиёҳванд моддалар савдоси
2024 йилнинг март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)