O‘zbekistonga o‘tish uchun “G‘ishtko‘prik” chegara bojxona postiga fuqaro boshqaruvida kirib kelgan avtomashina bojxona ko‘rigidan o‘tkazildi. Bu haqda Toshkent viloyati bojxona boshqarmasi matbuot xizmati xabar berdi.
Maʼlum qilinishicha, bojxona ko‘rigi natijasida mashinaning yuk xonasida yo‘lovchi bojxona deklaratsiyasida yozib ko‘rsatilmagan va og‘zaki so‘rovda maʼlum qilinmagan 16 dona qadoqda 2 800 dona 5,5 mm kalibrli pnevmatik qurol o‘qlari borligi aniqlandi.
Hozirda holat yuzasidan surishtiruv harakatlari davom etmoqda.
O‘q va qurol olib o‘tishga urinish holatlari
May oyida “G‘ishtko‘prik” chegara-bojxona posti orqali noqonuniy ravishda olib kirilayotgan qurol to‘xtatib qolingandi.
Avgustda esa Sankt-Peterburg—Toshkent yo‘nalishi bo‘yicha uchib kelgan xorij fuqarosiga tegishli bo‘lgan 1 dona qora rangli yo‘l sumkasi bojxona ko‘rigidan o‘tkazilganda yuklar ichidan bojxona nazorati uchun belgilangan tartibda taqdim etilmagan va ichki ishlar organlarining tegishli ruxsatnomalarisiz bo‘lgan 1 dona pnevmatik qurol va 1 dona pnevmatik quroldan otish uchun mo‘ljallangan 290 dona shariklar (zoldir) borligi aniqlangandi.
Sentabrda ham Rossiyadan kelgan fuqaro O‘zbekistonga o‘qotar qurolni yashirincha olib kirmoqchi bo‘lgandi.
Umuman olganda, 2024-yilning 9 oyida bojxona organlari tomonidan 888 kg giyohvandlik vositalari, 406 ming dona psixotrop va kuchli ta’sir etuvchi moddalar ushlab qolingan.
Maʼlumot uchun, fuqaroviy va xizmat qurolini hamda uning o‘q-dorilarini O‘zbekiston hududiga olib kirish, olib chiqish va tranzitini amalga oshirishda, tegishli organlar ruxsatnomalariga ko‘ra amalga oshiriladi.
Izoh (0)