Futbol o‘zining jozibadorligi, super gollari va feyr-pley kabi adolatli qoidalari bilan mashhur. Ammo muxlislar e’tiborini futbol olamidagi mushtlashuvlar, janjallar, ichkilikbozlik va giyohvandlik, shafqatsizlik va ahmoqliklar ham tortadi. Quyida futbol olamidagi eng shov-shuvli mojarolarni yodga olamiz.
Futboldagi ichkilikboz
Angliya futboli yulduzi Pol Gaskoyn 90-yillarda Buyuk Britaniyaning eng mashhur odamlaridan biri bo‘lgan. U stadionga minglab muxlislarni jalb qilar va futbolni a’lo darajada o‘ynardi. Ayniqsa, u Shotlandiyaning “Reynjers” klubi bilan katta yutuqlarga erishgan, jumladan, ikki marta mamlakat chempionligini qo‘lga kiritgan. Gaskoyn g‘alati qiliqlari bilan tez-tez yangiliklar orasidan joy olardi. Bir safar Pol “Midlsbro” klubining avtobusini o‘g‘irlab ketgan va uni pachoq qilgan.
Boshqa safar “Latsio”dagi taqdimotda ham o‘zini g‘alati tutib, bir necha bor kamera oldida uyatli mavzularda hazillashgan. Futbolchilik faoliyatini yakunlaganidan so‘ng esa ichkilikka berilib ketadi. Hushdan ketguncha ichish, janjallar, qon to‘kilishigacha borib yetadigan mushtlashuvlar — bularning barchasi Polning odatiy turmush tarziga aylangan. U yillar o‘tishi bilan donolashish o‘rniga, qariyapti, xolos.
Kantona va uning zarbasi
90-yillar futbolining yana bir yulduzi Erik Kantona ham yoshi ulg‘aygach, biroz o‘zgardi. Lekin uning yoshlikdagi bebosh xatti-harakatlari haqidagi voqealarni futbol muxlislari haligacha eslaydi. Jamoadoshlari bilan tortishuvlar — uning bunday “sarguzashtlari”ning kichik bir qismi, xolos. Shuningdek, Kantona yirtilgan libosini hakam tomonga irg‘itgan va Fransiya terma jamoasi bosh murabbiyi Anri Mishelni hammaning oldida “axlat qopi” deya haqorat qilgan.
Albatta, fransiyalik futbolchining faoliyatidagi eng shov-shuvli voqeani ham unutib bo‘lmaydi: bir kuni u maydondan chetlatilgach, tomoshabinning provokatsiyasiga uchib, uni kaltaklash uchun tribunaga chiqib ketadi. Muxlisni tepishga urinayotgan Erikning surati barcha tabloidlarda qayd etildi. Kantona jarima to‘lashiga va 120 soat jamoat ishlarida ishtirok etishiga to‘g‘ri keldi.
“Xudoning qo‘li” aralashgan mashmashalar
Diyego Maradona dunyoning minglab odamlarini futbolga oshiq qilgan bo‘lsa-da, bir necha bor janjalli voqealarga aralashib qolgan. 90-yilgi Jahon Chempionati chorak finalida qo‘li bilan gol urgani futbolga oid mavzu bo‘lsa, kokain iste’moli, doping qabul qilishi, jurnalistlarga pnevmatik miltiqdan o‘q uzish, aeroportdagi to‘polonlar sariq matbuot uchun noyob topilmalar bo‘lgan.
Biroq, yillar o‘tib, Diyego o‘zining sho‘x fe’lini jilovlashga erishgan. Giyohvandlikdan davolangan, turli xayriya tadbirlarida ishtirok etgan. Futbol sohasida esa Argentina va Yaqin Sharqda murabbiy sifatida ba’zi yutuqlarga erishgan.
Buyuk ig‘vogar
Italiyalik himoyachi Marko Materatssi o‘z nomini futbol tarixiga o‘chmas qilib yozib qoldirgan. 2006-yilgi mundialda himoyachining provokatsiyasiga uchib, Zidan uning ko‘kragiga boshi bilan zarba beradi va maydondan chetlatiladi. Bir soatdan keyin esa Marko kubokni boshi uzra ko‘taradi. Albatta, bu Markoning birinchi yomon qilig‘i emasdi. 2003-yilgi Milan derbisida Materatssi Andrey Shevchenkoning jig‘iga tegadi va oqibatda ko‘zidan zarba qabul qilib oladi. Oradan bir yil o‘tib, Marko o‘z hisobiga yana ikki qurbonni kiritib qo‘ydi: tribuna ostida “Siena” himoyachisini uradi va bir musht bilan “Vilyarreal” o‘yinchisi Sorinning burnini sindiradi.
“Jinnilar to‘dasi” boshlig‘i
Agar Materatssi raqibga ayyorlik bilan ta’sir o‘tkazgan bo‘lsa, “Bolta” laqabli Vinni Jons hech qachon raqiblarga chap yoki o‘ng tomondan zarba berishga tortinmagan. Bu yigit futbol maydonida o‘zining o‘ta qo‘polligi bilan mashhur bo‘ldi — u 12 marta qizil kartochka bilan jazolangan, bir marta maydonga tushganidan 3 soniya o‘tib, darhol qo‘pollik qilgan. 90-yillarda Vinnining jamoasi “Uimbldon”ni “jinnilar to‘dasi” deb nom olgan va Jons o‘zini bu to‘daning boshlig‘i sifatida his qilgan.
Uning faoliyatida “futbol qotilligi” ham bo‘lgan — Angliya terma jamoasi futbolchisi Geri Stivensga juda jiddiy qo‘pollik ishlatgan. Natijada, Geri faoliyatini yakunlashga majbur bo‘lgan. Jonsning o‘zi butsalarini mixga ilgach, kinolarda o‘zini sinab ko‘ra boshladi. Va hozirda ham muvaffaqiyatli aktyor sifatida o‘zini namoyon etmoqda.
Maydondagi qotillik
Panama terma jamoasi futbolchisi Luis Moreno futbol maydonida tom ma’noda qotillikni amalga oshirdi. To‘g‘ri, futbolchi o‘z raqibi yoki tomoshabinlarga zarar yetkazmadi, oddiy boyqushni o‘ldirib qo‘ydi. Kolumbiya chempionatidan o‘rin olgan “Deportivo Pereyra” va “Atletiko Xunior” jamoalari o‘rtasidagi bahsda Moreno boyo‘g‘lini to‘pdek tepib yubordi va qush 3 metr uzoqlikka uchib ketadi. Boyqush bir kundan keyin veterinariya markazida o‘lib qoldi.
Boyo‘g‘li raqib jamoaning maskoti bo‘lgani vaziyatni yana og‘irlashtirgan, shuning uchun Luis “Atletiko” muxlislari tomonidan qattiq tanqidlarga duchor bo‘lgan. Morenoning o‘zi uni futbol tarixidagi eng dahshatli ishlardan birini qilishga nima undaganini tushuntirib bera olmadi.
Angliyalik zo‘ravon
Ingliz futbolchisi Jo Barton Luis Moreno bilan solishtirganda, shunchaki yaxshi inson. Hech bo‘lmaganda u “qotillik” qilmagan. Ha, bir marta “Manchester Siti”dagi jamoadoshi Jeymi Tendining ko‘ziga sigaret tutgan. Jamoada janjal ko‘tarilmagan, balki Bartonga katta miqdorda jarima solingan. Undan tashqari, Tendining o‘zi ham keyinchalik Bartondan 65 ming funt sterling undirgan.
Jo “Everton” muxlislari bilan mojarodan keyin ham katta miqdorda jarima to‘lagan. Dastlab, u mersisaydliklarning 15 yoshli muxlisini urgan, oradan bir hafta o‘tib, mavsumoldi turnirda tomoshabinlar tarafga qarab, nomaqbul harakatlarni amalga oshirgan. Kaltak uchun u 120 ming funt to‘lagan bo‘lsa, ikkinchi qilig‘i jazosiz qolgan.
Benzema va uning jinsiy zo‘ravonlik bo‘yicha mojarolari
Fransiyalik hujumchi Karim Benzema faoliyatining yuqori cho‘qqisida bo‘lgan vaqtlarda terma jamoaga chaqirilmay qo‘ygandi. Ushbu chetlatishning asosiy sababi jinsiy zo‘ravonlik bo‘yicha ayblovlar edi. Karim 2010-yillarda Frank Riberi va Sidney Govu bilan birgalikda muammolarga duch kelgandayoq “sariq kartochka” olgandi. Ma’lum bo‘lishicha, uchalasi ham voyaga yetmagan qizga jinsiy tajovuz qilgan. Uchalasi ham qizning yoshi haqida bilmaganini ta’kidlagan va shundan so‘ng oqlangan.
Oradan 5 yil o‘tib esa, Benzema jamoadoshi Matye Valbuenaga uning ishtirokidagi video bilan shantaj qilish ishlarida ishtirok etganlikda ayblanib, terma jamoadan “chiqarib tashlanadi”. Karimning jinoiy sxemada ishtirok etgani haqidagi to‘g‘ridan to‘g‘ri faktlar aniqlanmagan, u na qamoq jazosini o‘tadi, na jarimaga tortildi. Lekin shundan keyin bir muddat terma jamoaga chaqirilmadi.
O‘z tishlarini raqibda sinab ko‘rish
“Liverpul” va “Barselona” sobiq hujumchisi Luis Suares raqib futbolchilarini tishlashdan ham toymagan. Hozirda “Inter Mayami”da to‘p surayotgan urugvaylik futbolchi faoliyati davomida kamida 3 marta raqiblarini tishlagan. 2010-yilning noyabr oyida “Ayaks”da o‘ynagan Suares Otman Bakkalni tishlagan va 7 o‘yinga diskvalifikatsiya qilingan.
2013-yilning aprelida Luis “Liverpul” va “Chelsi” o‘rtasidagi qarama-qarshilikda Branislav Ivanovichni tishlab olgan, biroq buni hakam sezmay qolgani uchun jazosiz qolgan. Nihoyat, uchinchisi 2014-yilgi Jahon Chempionatida bo‘lgan: jabrlanuvchi — italiyalik Jorjo Kyellini. Ushbu voqeadan keyin urugvaylik futbolchi katta miqdorda jarima to‘ladi va 4 oyga futboldan chetlatildi. Shundan keyin Sauresning “Barselona”dagi oltin davri boshlanib, barchasi unutildi.
Izoh (0)