АҚШ ва Мексика чегарасида чегарачилар ва муҳожирлар ўртасида отишма содир бўлди. Бу ҳақда Fox News хабар берди.
Маълум қилинишича, бир гуруҳ ноқонуний муҳожирлар чегарани кесиб ўтмоқчи бўлган, бироқ АҚШ чегара қўриқлаш хизмати ходимлари ўт очган ва уларни тўхтатган. Отишма оқибатида тан жароҳати олганлар йўқ. Отишма АҚШ ва Мексика ўртасидаги Фронтон ороли яқинида юз берган. У ердаги жиноий фаолият туфайли Фронтон “Картел ороли” деб ҳам аталади. Чегарачилар билан отишмага киришган муҳожирлар наркокартел аъзолари бўлиши мумкинлиги айтилмоқда.
Трампнинг миграция сиёсати
АҚШ президенти 21 январь куни чегарадаги барча ноқонуний ўтиш жойлари ёпилишини таъкидлади. У АҚШ жанубий чегараси орқали ноқонуний мигрантларнинг киришини тақиқлаш тўғрисидаги фармонни имзолади. Бошпана излаш баҳонаси билан у ерда қолиш ҳуқуқини чеклади.
Президент Ички хавфсизлик вазирлиги, Адлия вазирлиги ва Давлат департаментига АҚШга жанубдан ноқонуний кираётганларни чиқариб юбориш чораларини кўришни топширди. Пентагон чегарага қўшимча 1,5 минг аскар ва вертолётлар юборилишини эълон қилди. Шунингдек, 5 мингдан ортиқ ноқонуний мигрантларни депортация қилиш учун авиация тақдим этилади, уларнинг оқими ва ноқонуний савдосини тўхтатиш учун вақтинчалик ва доимий тўсиқлар қурилади.
Мексика президенти АҚШга бориш учун унинг мамлакатига келаётган ноқонуний мигрантлар ўз ватанларига қайтариб юборилишини айтди. Мексика АҚШдан ноқонуний мигрантларни олиб келаётган ҳарбий транспорт самолётини қабул қилишдан бош тортди.
Изоҳ (0)