Turkiya prezidenti Rajab Toyyib Erdo‘g‘on xalqaro o‘yinchilarni Suriyadan “qo‘llarini tortishga” chaqirdi va Anqara mamlakatda terroristik guruhlarning faoliyatiga chek qo‘yish uchun yetarli salohiyat va imkoniyatlarga ega ekanini aytdi.
Reuters nashrining xabar berishicha, bu haqda Turkiya yetakchisi hukmron Adolat va taraqqiyot partiyasi fraksiyasi yig‘ilishidagi nutqi chog‘ida aytgan. Prezident o‘z nutqida Suriyada faoliyat yuritayotgan, eng avvalo, Kurdiston ishchilar partiyasi (KIP) bilan bog‘liq terrorchi guruhlarni qurolsizlanishga chaqirdi. U, shuningdek, agar ular buni rad etsa, Anqara terrorizmni yo‘q qilish yo‘lini topishiga ishontirdi.
Avvalroq Hurriyet nashri Anqara, agar kurd terrorchilari qurollarini tashlamasa, Suriya bilan birgalikdagi operatsiyani boshlashi mumkinligi haqida xabar bergan.
Turkiya tashqi ishlar vaziri Hakan Fidan agar hukumat tomonidan qo‘yilgan shartlar bajarilmasa, mamlakat Suriya hududida faoliyat ko‘rsatayotgan kurd qurolli guruhlariga qarshi harbiy operatsiya o‘tkazishga majbur bo‘lishi haqida ta’kidlagan.
“Agar Kurdiston ishchilar partiyasi (KIP) terrorchilik tashkilotiga nisbatan kutilayotgan ishlar bajarilmasa, zarur choralar ko‘riladi. Zarur chora esa harbiy operatsiyadir”, dedi vazir.
U talablar orasida Suriya hududidan xorijlik terrorchilarni chiqarib yuborish, harakat a’zolarining qolganini esa “qurollarini topshirib, yangi ma’muriyat bilan hamkorlik qilish” kabilarni sanab o‘tdi.
Erdo‘g‘on, shuningdek, Suriyaning parchalanishi xavfi tug‘ilgan taqdirda “zarur choralar” ko‘rishini aytgan.
Suriya rasmiylari ham kurd jangarilaridan qurollarini tashlashni talab qildi
Hurriyet nashri Suriyaning yangi hukumati mamlakat shimolida joylashgan Kurdiston ishchilar partiyasining (KIP) jangarilaridan qurollarini tashlashni talab qilgani haqida xabar bergan edi.
Damashqda KIPning Suriyadagi bo‘limi hisoblanmish — Xalq mudofaa kuchlari va Suriyaning yangi hukumati vakillari o‘rtasida uchrashuv bo‘lib o‘tgan.
Ma’lum bo‘lishicha, kurd tomoni qurollarni tashlash talabi evaziga Suriyaning yangi armiyasi tarkibida kamida bitta armiya korpusi yoki diviziyasini tashkil etish, shuningdek, mamlakat shimolidagi neft konlarini teng taqsimlashni taklif qilgan.
Biroq yangi hokimiyat KIPga qurollarini so‘zsiz tashlab qo‘yish shartini qo‘yib, bu masalani hatto muhokama qilmadi, deyiladi xabarda.
Izoh (0)