Сурияда янги ҳокимиятни қўллаб-қувватлаётган жангарилар уч кун ичида камида 35 кишини қатл этди.

Сурия Инсон ҳуқуқлари кузатув марказининг хабар беришича, қатл этилганларнинг аксарияти ағдарилган Башар Асад ҳукуматининг собиқ амалдорлари бўлган. Янги ҳукмдорлар назоратидаги маҳаллий қуролли гуруҳларнинг ўнлаб аъзолари Хомс минтақасидаги “хавфсизлик операциялари”да иштирок этганлиги сабабли ҳибсга олинди.

Жанговар бўлинмалар Асад мансуб бўлган алавий озчилик аъзоларига қарши “қасос ҳаракатлари”ни амалга оширди. Улар “тартибсизлик ҳолати, қуролларнинг тарқалиши ва янги ҳукмдорлар билан алоқалари”дан фойдаланиб, “эски ҳисобларни тозалади”, дейилади марказ баёнотида.

Аввалроқ SANА расмий ахборот агентлиги янги ҳукумат “жиноий гуруҳ” аъзоларини хавфсизлик операцияси пайтида ўзларини хавфсизлик кучлари ходимлари сифатида кўрсатиб, аниқланмаган “қонунбузарликлар” содир этганликда айблаганини хабар қилган эди.

Инсон ҳуқуқлари кузатув маркази ўзбошимчалик билан оммавий ҳибсга олишлар, шафқатсиз қийноқлар, диний рамзларга ҳужумлар, тинч аҳоли жасадларини ҳақоратлаш ҳамда ўзбошимчалик ва шафқатсиз қатл этишлар ҳақида маълумот берди.

Бу жиноятлар “мисли кўрилмаган шафқатсизлик ва зўравонлик” билан содир этилган, дейилади хабарда.

Civil Peace Group ташкилоти маълумотларига кўра, Хомс минтақасидаги бир нечта қишлоқ аҳолиси операция қурбонига айланган. Ташкилот “асоссиз қонунбузарликлар”ни, жумладан қуролсиз эркакларни ўлдиришни қоралаган.

Сурияда Асад режимининг қулаши

Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.

Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.

Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган. Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди.

10 декабрь куни Идлиб шаҳрида исёнчиларга раҳбарлик қилган Муҳаммад ал-Башир ўзини Суриянинг ўтиш даври ҳукумати раҳбари этиб тайинлади. У фуқароларга қарата қилган телевидение мурожаатида бу лавозимни камида 2025 йил 1 мартгача эгаллаб туришини маълум қилди.