Suriyaning ag‘darilgan prezidenti Bashar Asad tarafdorlari o‘tish davri hukumati xavfsizlik kuchlarining 14 nafar a’zosini otib o‘ldirdi, yana 10 nafarini jarohatladi. Bu haqda Suriyaning yangi rasmiylariga tayanib SANA davlat axborot agentligi xabar berdi.
Suriya Ichki ishlar vazirligi bayonotiga ko‘ra, xavfsizlik kuchlari Asad rejimi davridagi sobiq zobitni hibsga olishga urinayotganda pistirmaga tushib qolgan. Suriya Inson huquqlari kengashi (SOHR) ma’lumotlariga ko‘ra, zobit siyosiy mahbuslar o‘nlab yillar davomida qiynoqqa solingan va qatl etilgan Sednaya qamoqxonasidagi jinoyatlarga aloqador.
SOHR ma’lumotlariga ko‘ra, u “minglab mahbuslarga o‘lim jazosi va o‘zboshimchalik bilan hukm chiqargan”.
“To‘qnashuvlar chog‘ida uch nafar qurollangan shaxslar ham halok bo‘lgan”, deydi kuzatuvchilar.
SANA agentligiga ko‘ra, 26-dekabr kuni Suriyaning yangi harbiy qo‘mondonligi Tartus viloyatining qishloq hududlarida avvalgi ma’muriyatning sobiq xodimlarini ta’qib qilish bo‘yicha operatsiya boshlagan.
25-dekabr kuni Suriyaning bir qancha shaharlari aholisi Aleppo shahridagi alaviylar ziyoratgohi tahqirlanayotgani aks etgan video tarqalib ketganidan norozilik bildirib, ko‘chalarga chiqqan. Muvaqqat hukumat IIV xabariga ko‘ra, isyonchilarning Halabga hujumi boshlangan noyabr oyida ziyoratgoh “noma’lum guruhlar” tomonidan vayron qilingan.
Sobiq rejimning siyosiy va harbiy elitasining ko‘p vakillari, jumladan, Asad oilasi shialikning bir tarmog‘i bo‘lmish alaviylikka mansub.
SOHR maʼlumotlariga ko‘ra, ommaviy norozilik namoyishlari alaviylar tayanch nuqtasi bo‘lgan shaharlarda bo‘lib o‘tgan. AFP namoyishchilar minglab kishini tashkil etishini qayd etgan. Aniqlanishicha, bir namoyishchi halok bo‘lgan, yana besh nafari jarohatlangan. Shu munosabat bilan Suriyaning yangi hukumati Latakiya va Xoms viloyatlarida komendantlik soati joriy qildi.
Bashar Asad rejimining qulashi
Noyabr oyi oxiri va dekabr oyi boshida Suriyadagi islomiy muxolifatning sunniylar guruhi Hayat Tahrir ash-Shom boshchiligidagi qurolli kuchlari ikki haftadan kamroq vaqt ichida mamlakatning eng yirik shaharlarini bosib olishga muvaffaq bo‘ldi. 8-dekabrga o‘tar kechasi muxolifat kuchlari poytaxt Damashqni egallab, prezidentni hokimiyatdan ag‘dardi. U otasi bilan Suriyani yarim asrdan ortiq boshqargan. Asad iste’foga chiqdi, mamlakatni tark etdi va Rossiyaga qochib ketib, u yerda boshpana oldi.
Izoh (0)