Suriyada prezident Bashar Asadni ag‘dargan isyonchilar o‘tish hukumatidagi dastlabki tayinlovlar haqida xabar berdi. Suriya tashqi ishlar vaziri Esad Hasan Shayboniy va mudofaa vazirligini esa muhandis Marhaf Abu Kasra bo‘ldi. Bu haqda Anadolu xabar berdi.
Shayboniy Damashq universitetining ingliz tili va adabiyoti fakultetini tamomlagan. OAV xabarlariga ko‘ra, uning siyosatshunoslik va xalqaro munosabatlar bo‘yicha magistr darajasiga ham egai. 2011-yilda mamlakatda fuqarolar urushi boshlanganidan beri Shayboniy Suriya muxolifati faoliyatida faol ishtirok etgan.
Urush paytida Suriya hududining uchdan ikki qismi hukumat kuchlari nazorati ostida bo‘lgan, mamlakatning shimoli-g‘arbiy qismi esa 2017-yildan buyon “Hayat Tahrir ash-Shom” (HTSH) nazoratida bo‘lgan. Bu “ma’muriyat”da Shayboniy siyosiy ishlar bo‘limi boshlig‘i lavozimida ishlagan.
Anadolu nashrining yozishicha, u “xorijiy davlatlar va xalqaro tashkilotlar, jumladan, BMT muassasalari va gumanitar tuzilmalar vakillari bilan hamkorlik qilish” uchun mas’ul bo‘lgan.
Suriyaning yangi mudofaa vaziri Abu Kasra Xama viloyatining Xalfaja shahrida tug‘ilgan. U HTSHning eng mashhur yetakchilaridan biridir.
Suriyada Asad rejimi qulashi
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirdi, odamlar buyumlarni talon-toroj qildi. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlandi.
Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi.
10-dekabr kuni Idlib shahrida isyonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinladi. U fuqarolarga qarata qilgan murojaatida bu lavozimni kamida 2025-yil 1-martgacha egallab turishini aytdi.
Izoh (0)