Janubiy Koreyada prokurorlar hokimiyatdan chetlatilgan va hibsga olingan prezident Yun Sok Yolga nisbatan ayblov e’lon qildi. Bu haqda Yonhap xabar berdi.
Yun Sok Yol “isyonni boshqarganlikda” ayblanib, hibsga olindi. Siyosatchi olti oy ichida boshlanishi kerak bo‘lgan sudgacha hibsda qoladi.
Ayblov xulosasida ta’kidlanishicha, prezident sobiq mudofaa vaziri Kim Yon Xyon va boshqa shaxslar bilan til biriktirib, 2024-yil 3-dekabr kuni urush, qurolli to‘qnashuv yoki shunga o‘xshash milliy inqiroz alomatlari bo‘lmasa-da, “konstitutsiyaga zid va noqonuniy” harbiy holat joriy etish orqali qo‘zg‘olon chiqarishga uringan.
Bundan tashqari, Yun harbiy holatni bekor qilish uchun o‘tkaziladigan ovoz berishni barbod qilish maqsadida parlamentga harbiylarni yuborish, Milliy saylov komissiyasi xodimlarini qamoqqa olishni rejalashtirganlikda ham ayblanmoqda.
Lavozimidan chetlashtirilgan prezident himoyachilari qo‘zg‘olonga undash bo‘yicha qo‘yilgan ayblovni rad etib, uni sudda muhokama qilishlarini bildirdi. Ular harbiy holat e’lon qilinishi isyon sifatida baholanishi mumkin emasligini ta’kidladi.
Yun Sok Yolning hibsga olinishi
15-yanvar kuni Janubiy Koreyada tergovchilar ikkinchi urinishda Yun Sok Yolni hibsga oldi. Hokimiyatdan chetlatilgan prezidentni hibsga olishga birinchi urinish 3-yanvar kuni sodir bo‘lgandi. Biroq o‘shanda Yun Sok Yolning qo‘riqchilari politsiya hibsga olishiga qarshilik qilgan. Ikkinchi urinishda esa uzoq davom etgan qarama-qarshilikdan so‘ng, tergovchilar prezidentni Korrupsiya bo‘yicha tergov byurosiga olib borishga muvaffaq bo‘ldi.
Yun Sok Yol ushlangunga qadar videomurojaat e’lon qilib, hibsga olishni “noqonuniy” deb bilishi, ammo qon to‘kilishining oldini olish uchun tergovchilar va politsiyaga bo‘ysunishga qaror qilganini aytgan.
Dekabr oyi boshida Janubiy Koreya prezidenti mamlakatda harbiy holat joriy etishga muvaffaqiyatsiz urinib ko‘rdi, shundan so‘ng parlament uni isyon ko‘tarishga uringanlikda ayblab, davlat rahbariga impichment e’lon qildi.
Yun 14-dekabrdan (parlament uning impichmenti uchun ovoz berganidan) prezidentlik lavozimidan chetlashtirilgan. Uning o‘zi dekabrning birinchi yarmidayoq qo‘zg‘olonga urinish ayblovlarini rad etib, harbiy holat joriy etilishi “siyosiy jihatdan tasdiqlangan qaror” ekanini aytgan. U davlatni falaj qilgan muxolifatdan himoya qilish uchun shunday qaror qabul qilgandi.
Prezident advokatlarining hibsga olishning qonuniyligiga e’tiroz bildirishga urinishi tufayli uning 48 soatlik qamoq muddati to‘xtatilgandi. Keyingi hibsga olish uchun yangi order chiqarilgan.
Izoh (0)