Janubiy Koreya prezidenti Yun Sok Yol Birlashgan tergov guruhining so‘roqqa chaqiruvini ikkinchi marta rad etdi.
Vaqtinchalik lavozimidan chetlashtirilgan respublika prezidenti qisqa muddatli harbiy holat e’lon qilgani uchun aybdor deb topilgan, u Yuqori mansabdor shaxslarning korrupsiyasini tergov qilish boshqarmasi (CIO) idorasiga kelmagan.
Tergov guruhi Yun Sok Yolni soat 10:00 da kutgan. Soat 18:00 holatiga ko‘ra, tergovchilar siyosatchidan hech qanday xabar olmagan va u so‘roqqa chaqirish haqidagi ikkinchi so‘rovni e’tiborsiz qoldirganini tasdiqlagan. Shuningdek, prezident advokat tayinlash to‘g‘risida bildirishnoma ham topshirmagan.
Avvalroq Janubiy Koreya politsiyasi yuqori martabali amaldorlar orasidagi korrupsiyani tergov qilish boshqarmasi va Mudofaa vazirligi bilan birgalikda prezident va boshqa shaxslarni qo‘zg‘olonga undash, harbiy holat joriy etishda hokimiyatni suiiste’mol qilishda ayblab, qo‘shma tergov o‘tkazishga kirishgan edi. Prokuratura bu ish yuzasidan alohida tergov boshlagan bo‘lsa-da, keyinchalik vakolatlarni qo‘shma tergov guruhiga topshirgan.
Tergov guruhi uchinchi marta chaqiruv qog‘ozi yuborish yoki prezidentni hibsga olish uchun order olish kabi ehtimoliy choralarni ko‘rib chiqish to‘g‘risida qaror qabul qilishi kutilmoqda. Tergov, shuningdek, impichment ishi bo‘yicha sud jarayoni korrupsiyaga qarshi organning keyingi harakatlariga “hal qiluvchi” ta’sir ko‘rsatmasligini ta’kidladi.
Janubiy Koreya parlamenti prezidentning impichmentini qo‘llab-quvvatlagan edi, 204 nafar deputat prezidentni lavozimidan chetlatish uchun ovoz bergan, 85 nafari qarshi ovoz bergan.
Parlament impichmentni ma’qullagani munosabati bilan Yun Sok Yolning vakolatlari vaqtinchalik to‘xtatilgan, Konstitutsiyaviy sud esa prezidentni lavozimidan chetlashtirish masalasini ko‘rib chiqmoqda. Buning uchun sudga 180 kun vaqt beriladi, yakuniy hukm chiqarilgunga qadar bosh vazir Xan Dok Su davlat rahbari vazifasini bajaradi.
Izoh (0)