“Toshkent—Sharqiy” aeroporti qurilishini 2025-yil sentyabr oyi boshida yakunlash rejalashtirilmoqda. Bu haqda Uzbekistan Airways matbuot xizmati Spot’ga ma’lum qilgan.
Qayd etilishicha, yangi aeroportga faqat biznes-aviatsiyaning charter reyslarigina ko‘chiriladi.
Iyun oyi o‘rtalarida Shavkat Mirziyoyev ushbu aeroport qurilishining borishi bilan tanishgandi. O‘sha paytda ikkita terminal — rasmiy delegatsiyalarni qabul qilish va biznes aviatsiyasiga xizmat ko‘rsatish uchun mo‘ljallangan, shuningdek, samolyotlar to‘xtash maydoni va angar inshootlari qurilishi davom etayotgandi. Davlat rahbari loyihaning texnik xususiyatlari, terminallarning arxitekturaviy yechimi bilan tanishib, qurilish ishlarini jadallashtirish bo‘yicha topshiriqlar bergandi.
Aeroport noqulay ob-havo sharoitlarida ham uchish-qo‘nishni ta’minlovchi ICAO III-A toifasidagi ilg‘or radiotexnika va meteorologiya uskunalari bilan jihozlanadi. Bu tuman va ko‘rish nolga teng bo‘lgan sharoitda ham parvozlarni qabul qilish imkonini beradi.
Taqdim etilgan bosh rejaga ko‘ra, ushbu aeroportning umumiy maydoni 561 gektarni tashkil etadi. Yo‘lovchi terminali soatiga 100 kishigacha xizmat ko‘rsatadi. Aerodrom perronida bir vaqtning o‘zida 23 ta ikki palubali Boeing-747 samolyotlari sig‘ishi mumkin bo‘ladi. Yopiq angarlarda samolyotlar soz va xavfsiz saqlanishi uchun zamonaviy sharoitlar ta’minlanadi.
Sobiq harbiy aerodrom negizida yangi aeroport qurilishi prezidentning 2017-yil 30-iyundagi qaroriga muvofiq amalga oshirilmoqda. Shavkat Mirziyoyev 2023-yilning iyul va 2024-yilning sentyabr oylarida ham “Toshkent—Sharqiy” aeroporti qurilishini ko‘zdan kechirgandi. Qurilish ishlarini moliyalashtirish, terminalning tashqi ko‘rinishi va delegatsiyalar uchun qulayliklarni qayta ko‘rib chiqish bo‘yicha topshiriqlar bergandi.
Izoh (0)