Janubiy Koreya politsiyasi harbiy holat joriy etilishi bo‘yicha olib borilayotgan tergov doirasida harbiy razvedka qo‘mondonligining amaldagi va sobiq rahbarlarini hibsga oldi. Bu haqda Yonhap agentligi xabar berdi.
Politsiyaning maxsus tergov guruhi hozirgi qo‘mondon general-mayor Mun San Ho va qo‘mondonlikning sobiq rahbari Noh San Vonni hibsga olganini ma’lum qildi, deyiladi xabarda.
Mun prezident Yun Sok Yol kutilmaganda harbiy holat e’lon qilganidan so‘ng Kvachxondagi Milliy saylov komissiyasi idorasiga qo‘shin yuborganlikda gumonlanmoqda. Armiya voqea joyiga ikki daqiqada yetib kelgani sababli, huquqni muhofaza qilish organlari xodimlari Munning prezident harbiy holat e’lon qilish niyatidan xabardor bo‘lgani yoki uni joriy etishda ishtirok etgani haqida taxmin qilmoqda.
Hozirgi harbiy razvedka boshlig‘i sobiq mudofaa vaziri Kim Yong Hyunning yaqin hamkori hisoblanadi. Tergov ma’lumotlariga ko‘ra, u Yunni harbiy holatni joriy etishga tayyorlaganlikda gumonlanmoqda. Politsiya ikkala rahbarni so‘roq qilish uchun 48 soatgacha ushlab turishi mumkin. Agar sud bu vaqt ichida rasmiy qamoq orderini bermasa, Mun va Nohni ozod qilish shart bo‘ladi.
Koreyada harbiy holat
Janubiy Koreya prezidenti Yun Sok Yol 3-dekabr kuni kechqurun mamlakatda favqulodda harbiy holat e’lon qildi. Parlament va siyosiy partiyalarning faoliyati taqiqlandi. Davlat rahbari bu qarorni “konstitutsiyaviy tartibni himoya qilish va mamlakat ichidagi Shimoliy Koreya tarafdorlarini yo‘q qilish” zarurati bilan izohladi.
Hukumat harakatlaridan norozi bo‘lib, parlament binosi oldida namoyishchilar to‘plandi. Politsiya parlamentga kirishni to‘sib qo‘ydi va shahar ko‘chalarida harbiy texnika paydo bo‘ldi.
Bir necha soatdan so‘ng 300 deputatdan 190 nafari parlamentga kirishga muvaffaq bo‘ldi va harbiy holatni bekor qilish uchun ovoz berdi. Muxolifat yetakchisi Li Je Men prezident qarorini “konstitutsiyaga zid” deb atadi va uni “xalqqa qarshi” qadam sifatida qoraladi. Kechroq Janubiy Koreya prezidenti mamlakatda joriy etilgan harbiy holatni bekor qilishga rozi bo‘ldi.
Kim Yon Hyun 3-dekabr kuni harbiy holat joriy etilishi bilan bog‘liq qonunbuzarliklar bo‘yicha tergov ishining birinchi gumondori bo‘ldi.
Izoh (0)