Janubiy Koreya Mudofaa vazirligi aksilrazvedka byurosi rahbari Yo In Xyon va poytaxt mudofaa qo‘mondonligi rahbari Li Jin Vu 3-dekabr kuni prezident Yun Sok Yol tomonidan e’lon qilingan harbiy holatga aloqadorlikda gumonlanmoqda. Mamlakat prokuraturasi 31-dekabr kuni ikki mansabdorga nisbatan ayblov e’lon qildi, deb xabar bermoqda Yonhap axborot agentligi.
Avvalroq sobiq mudofaa vaziri Kim Yon Xyonga nisbatan ayblovlar ilgari surilgan edi.
Yeo In Xyon o‘sha paytdagi mudofaa vaziri buyrug‘i bilan 3-dekabr kuni harbiy holat joriy etilganidan keyin parlament va Milliy saylov komissiyasiga qo‘shin yuborganlikda gumon qilinmoqda. Unga qo‘yilgan ayblovlar orasida 14 kishini, jumladan, asosiy muxolif partiyalar yetakchilarini hibsga olishga buyruq berish ham kiradi.
Li Jin Vu esa parlamentga qo‘shin kiritishga buyruq berganlikda va deputatlarni hibsga olganlikda ham ayblanmoqda.
“Prokurorlar qo‘mondonlarning xatti-harakatlari konstitutsiyaviy tuzumni ag‘darishga qaratilgan tartibsizliklarni qo‘zg‘ashdan iborat bo‘lgan deb gumon qilmoqda”, deb yozadi Yonhap.
Avvalroq Janubiy Koreya politsiyasi mamlakatning boshqa huquqni muhofaza qiluvchi va kuch tuzilmalari bilan birgalikda prezident Yun Sok Yolga nisbatan e’lon qilingan ayblov doirasida o‘z vakolatlarini suiiste’mol qilish va deputatlarning faoliyatiga to‘sqinlik qilish uchun qo‘shin yuborish va isyonga aloqadorlik kabi ayblovlar bo‘yicha qo‘shma tekshiruv o‘tkazgan edi.
Eslatib o‘tamiz, 3-dekabr kuni Janubiy Koreya prezidenti Yun Sok Yol mamlakatda harbiy holat joriy etilganini ma’lum qildi. Keyinchalik u parlament deputatlari qarshiligi tufayli harbiy holatni bekor qilishga rozi bo‘ldi. Mamlakatda harbiy holat taxminan besh soat davom etdi.
Mamlakatda harbiy holat joriy etish to‘g‘risidagi qarori ortidan u lavozimidan vaqtincha chetlatildi. Janubiy Koreya parlamenti davlat rahbariga nisbatan impichment e’lon qilgan, bu haqdagi qarorni 204 nafar deputat ma’qullagan, 85 nafari esa qarshi ovoz bergandi.
31 dekabr kuni Janubiy Koreya sudi isyonga urinish va hokimiyatni suiiste’mol qilishda ayblanib, so‘roqqa chaqirilgan, biroq jinoyat ishi doirasida ko‘rsatma berishni istamayotgan, chaqiruv qog‘ozlarini olganiga qaramay, so‘roqqa bir necha bor kelmagan Yun Sok Yolni hibsga olish orderini ma’qullagandi.
Izoh (0)