Janubiy Koreya prezidenti Yun Sok Yol o‘z xavfsizligi uchun xavotirdaligi sababli Konstitutsiyaviy sud tomonidan impichment ishi bo‘yicha birinchi rasmiy muhokamada ishtirok etmaydi. Bu haqda Koreya yetakchisining advokati Yun Gapgen ma’lum qildi.
“Yunni hibsga olish uchun noqonuniy va haqiqiy bo‘lmagan orderni bajarishga urinishlar davom etayotgan bir paytda, biz prezidentning shaxsiy xavfsizligi va unga qarshi ehtimol tutilgan provokatsiyalardan xavotirdamiz”, dedi advokat.
U davlat rahbari sud majlislarida ishtirok etishi uchun uning shaxsiy xavfsizligi ta’minlanishi zarurligini bildirdi. Yun advokatlari ta’kidlashicha, prezident mamlakatda harbiy holat e’lon qilinishi bilan bog‘liq vaziyatda o‘z nuqtai nazarini va qarorlarini asoslash uchun qulay vaqtda impichment ishi bo‘yicha sud jarayoniga boradi.
Konstitutsiyaviy sud 14-yanvar kuni prezident impichmenti bo‘yicha sud jarayonida og‘zaki munozaralarni boshlashni va 4-fevralga qadar beshta eshituvni o‘tkazishni rejalashtirgan. Agar Yun sud majlisiga kelmasa, sud majlisni to‘xtatishi va 16-yanvar kuni ikkinchi sud muhokamasini e’lon qilishi kerak bo‘ladi.
Koreyada ilk bor amaldagi prezident hibsga olinadi
Seulning G‘arbiy okrug sudi 31-dekabr kuni prezident Yun Sok Yolni hibsga olish uchun order berdi. Bunga lavozimidan chetlatilgan prezident qo‘zg‘olonga rahbarlik qilish va hokimiyatni suiiste’mol qilishda ayblanib, uch marta so‘roqqa kelmagani sabab bo‘ldi. Bu Janubiy Koreya tarixida amaldagi davlat rahbariga hibsga olish uchun order berilgan birinchi holatdir. Yonhap xabariga ko‘ra, tintuv uchun order ham berilgan.
Prezident harbiy holat joriy etishga uringani uchun hokimiyatdan chetlashtirilgandi
Janubiy Koreya parlamenti 14-dekabr kuni Yun Sok Yolni hokimiyatdan chetlatdi. Bunga davlat rahbari tomonidan 3-dekabr kuni siyosiy muxoliflarga qarshi kurashish maqsadida e’lon qilingan harbiy holat sabab bo‘ldi. Yunning qarori jamoatchilikning noroziligiga sabab bo‘ldi, parlament harbiy holatni tezda bekor qilishga muvaffaq bo‘ldi.
Prezident vazifasini bajaruvchi dastlab mamlakat bosh vaziri Xan Dok Su bo‘ldi. Biroq 27-dekabr kuni Janubiy Koreya parlamenti uni ham hokimiyatdan chetlatishga ovoz berdi. Prezident vazifasini bajaruvchi lavozimida uning o‘rnini bosh vazirning birinchi o‘rinbosari, iqtisodiyot va moliya vaziri Chxve San Mok egalladi. U barqarorlikni tiklash uning siyosatining ustuvor yo‘nalishi ekanini bildirdi.
Janubiy Koreyada harbiy holat e’lon qilinishiga aloqador bo‘lgan bir necha amaldorlar, jumladan, sobiq mudofaa vaziri Kim Yon Xyon va bir necha yuqori martabali harbiy razvedka xodimlari hibsga olingan.
Izoh (0)