Janubiy Koreya politsiyasi lavozimidan chetlashtirilgan prezident Yun Sok Yolning Davlat xavfsizlik xizmati idorasiga yana tashrif buyurdi. Bu safar ular harbiy holat e’lon qilinishi bilan bog‘liq isyon ishi bo‘yicha tintuv o‘tkazishni maqsad qilgan.
Mazkur idora prezident ma’muriyati majmuasida joylashgan. Huquq-tartibot organlari davlat rahbarining Samchxondon tumanidagi yashirin qarorgohidan videokuzatuv kameralarining yozuvlarini olib qo‘yishni rejalashtirmoqda.
Yonhap nashrining xabar qilishicha, videokuzatuv kameralaridagi yozuvlarni saqlash uchun serverlar Prezident Xavfsizlik xizmati idorasida joylashgan. Bu serverlar tergov uchun zarur, chunki Samchxondondagi uyda, taxminlarga ko‘ra, Yun Sok Yol 3-dekabr kuni harbiy holat e’lon qilinishidan uch soat oldin milliy va poytaxt politsiyasi boshliqlari bilan uchrashgan. Politsiya o‘sha kuni prezident huzuriga yana kimlar kirganini aniqlash niyatida.
Nashr ma’lumotlariga ko‘ra, Davlat xavfsizlik xizmati “harbiy sir yoki maxfiy hukumat ma’lumotlari saqlanadigan joylarda tintuv o‘tkazish uchun vakolatli organlarning roziligi talab etiladi” degan talabni ro‘kach qilib, politsiyachilarga kirishni rad etgan. 11-dekabr kuni politsiya prezident ma’muriyatida tintuv o‘tkazishga uringan, ammo yana rad javobini olgan.
19-yanvar kuni Seulning G‘arbiy okrug sudi impichment natijasida lavozimidan chetlatilgan Yun Sok Yolni qamoqqa olish to‘g‘risida qaror chiqardi. Uning o‘n minglab tarafdorlari norozilik belgisi sifatida sud binosiga bostirib kirishdi. Sudning ta’kidlashicha, u qamoqxonadan tashqarida bo‘lsa, isyon va hokimiyatni suiiste’mol qilish bo‘yicha ayblovlar bilan bog‘liq dalillarni yo‘q qilishi mumkin. Shunga qaramay, Yun Sok Yol hamon so‘roqqa kelish talablarini e’tiborsiz qoldirmoqda.
Dekabr oyi boshida Janubiy Koreya prezidenti mamlakatda harbiy holat joriy etishga muvaffaqiyatsiz urinib ko‘rdi, shundan so‘ng parlament uni isyon ko‘tarishga uringanlikda ayblab, davlat rahbariga impichment e’lon qildi.
Yun 14-dekabrdan (parlament uning impichmenti uchun ovoz berganidan) prezidentlik lavozimidan chetlashtirilgan, ammo uni lavozimidan chetlashtirish uchun impichment Konstitutsiyaviy sud tomonidan ma’qullangan bo‘lishi kerak. Sud qaror chiqarmaguncha, Yun Sok Yol rasman prezident bo‘lib qoladi.
Yunning o‘zi dekabrning birinchi yarmidayoq qo‘zg‘olonga urinish ayblovlarini rad etib, harbiy holat joriy etilishi “siyosiy jihatdan tasdiqlangan qaror” ekanini aytgan. U davlatni falaj qilgan muxolifatdan himoya qilish uchun shunday qaror qabul qilgandi.
Izoh (0)