Koreya Respublikasi prezidenti ma’muriyati tergovchilarga harbiy holat voqealari bilan bog‘liq qo‘zg‘olon ishi bo‘yicha prezident binosida tintuv o‘tkazishga ruxsat bermadi. Bu haqda Yuqori mansabdor shaxslarga nisbatan korrupsiyaga qarshi kurashish boshqarmasi ma’lum qildi.
“Boshqarma joriy yilning 22-yanvar kuni prezident ma’muriyati va uning qarorgohida tintuv o‘tkazish uchun orderni ijro etishga urinib ko‘rdi, biroq prezident ma’muriyati soat 15:00 da tintuvga ruxsat bermadi. Maxsus tergov qo‘mitasining soat 16:50 dagi eshituvlarini hisobga olib, order ijrosi to‘xtatildi”, deyiladi boshqarma xabarida.
Janubiy Koreya Jinoyat kodeksida ta’kidlanishicha, davlat siri to‘g‘risidagi qonun bilan qo‘riqlanadigan hududda tintuv o‘tkazish uchun tegishli organning roziligi zarur. Ma’muriyat bunday ruxsatni bermadi. Qarorgoh bilan ham xuddi shunday holat yuzaga keldi — prezident qo‘riqlash xizmati boshlig‘i vazifasini bajaruvchi shaxs parlamentda harbiy holat voqealariga bag‘ishlangan eshituvlarda ishtirok etayotgan edi.
20-yanvar kuni politsiya prezidentning “maxfiy uyi”da tintuv o‘tkazishga muvaffaqiyatsiz urinib ko‘rdi.
Yonhap nashrining xabar qilishicha, videokuzatuv kameralaridagi yozuvlarni saqlash uchun serverlar Prezident Xavfsizlik xizmati idorasida joylashgan. Bu serverlar tergov uchun zarur, chunki Samchxondondagi uyda, taxminlarga ko‘ra, Yun Sok Yol 3-dekabr kuni harbiy holat e’lon qilinishidan uch soat oldin milliy va poytaxt politsiyasi boshliqlari bilan uchrashgan. Politsiya o‘sha kuni prezident huzuriga yana kimlar kirganini aniqlash niyatida.
Nashr ma’lumotlariga ko‘ra, Davlat xavfsizlik xizmati “harbiy sir yoki maxfiy hukumat ma’lumotlari saqlanadigan joylarda tintuv o‘tkazish uchun vakolatli organlarning roziligi talab etiladi” degan talabni ro‘kach qilib, politsiyachilarga kirishni rad etgan. 11-dekabr kuni politsiya prezident ma’muriyatida tintuv o‘tkazishga uringan, ammo yana rad javobini olgan.
19-yanvar kuni Seulning G‘arbiy okrug sudi impichment natijasida lavozimidan chetlatilgan Yun Sok Yolni qamoqqa olish to‘g‘risida qaror chiqardi. Uning o‘n minglab tarafdorlari norozilik belgisi sifatida sud binosiga bostirib kirishdi. Sudning ta’kidlashicha, u qamoqxonadan tashqarida bo‘lsa, isyon va hokimiyatni suiiste’mol qilish bo‘yicha ayblovlar bilan bog‘liq dalillarni yo‘q qilishi mumkin. Shunga qaramay, Yun Sok Yol hamon so‘roqqa kelish talablarini e’tiborsiz qoldirmoqda.
Dekabr oyi boshida Janubiy Koreya prezidenti mamlakatda harbiy holat joriy etishga muvaffaqiyatsiz urinib ko‘rdi, shundan so‘ng parlament uni isyon ko‘tarishga uringanlikda ayblab, davlat rahbariga impichment e’lon qildi.
Yun 14-dekabrdan (parlament uning impichmenti uchun ovoz berganidan) prezidentlik lavozimidan chetlashtirilgan, ammo uni lavozimidan chetlashtirish uchun impichment Konstitutsiyaviy sud tomonidan ma’qullangan bo‘lishi kerak. Sud qaror chiqarmaguncha, Yun Sok Yol rasman prezident bo‘lib qoladi.
Yunning o‘zi dekabrning birinchi yarmidayoq qo‘zg‘olonga urinish ayblovlarini rad etib, harbiy holat joriy etilishi “siyosiy jihatdan tasdiqlangan qaror” ekanini aytgan. U davlatni falaj qilgan muxolifatdan himoya qilish uchun shunday qaror qabul qilgandi.
Izoh (0)