Janubiy Koreyaning vaqtincha lavozimidan chetlashtirilgan prezidenti Yun Sok Yol prokuraturaga so‘roqqa chaqirildi. U harbiy holat e’lon qilgani sababli isyon ko‘tarishga urinish va hokimiyatni suiiste’mol qilishda ayblanmoqda.
Janubiy Koreyaning Yonhap agentligining ma’lum qilishicha, bu Yun Sok Yolga yuborilgan ikkinchi chaqiruv xati bo‘lib, u birinchisini e’tiborsiz qoldirgan. Agar impichment e’lon qilingan prezident 21-dekabrgacha kelmasa, uni qamoqqa olish uchun order berish masalasi ko‘rib chiqilishi mumkin.
Prokuraturadan tashqari, Yun Sok Yolni Janubiy Koreya politsiyasi, yuqori martabali amaldorlar o‘rtasidagi korrupsiyani tergov qilish boshqarmasi va Mudofaa vazirligining tergov bo‘limidan iborat qo‘shma tergov guruhi ham so‘roqqa chaqirgan. Bu chaqiruvga ko‘ra, lavozimidan chetlashtirilgan prezident 18-dekabrgacha kelishi kerak.
Shuningdek, tergovchilar prezidentning telefon qo‘ng‘iroqlari yozuvlarini olish maqsadida uning xavfsizlik xizmatida tintuv o‘tkazgani ma’lum qilindi.
Yun Sok Yolning o‘zi esa avvalroq isyonchilik ayblovlarini ochiqchasiga rad etgan edi.
14-dekabr kuni Janubiy Koreya parlamentining 300 nafar a’zosidan 204 nafari Yun Sok Yolni lavozimidan chetlatish uchun ovoz berdi. Bunga prezidentning 3-dekabr kuni mamlakatda kutilmaganda harbiy holat joriy etgani sabab bo‘ldi. Voqealarning bunday rivojlanishi parlament tomonidan qo‘llab-quvvatlanmadi, shundan so‘ng hukumat prezident qarorini bekor qilishga majbur bo‘ldi.
Mamlakatda Yun Sok Yol hamda uning bir qator tarafdorlariga qarshi tergov boshlandi va 7-dekabr kuni parlamentda mamlakat yetakchisiga impichment masalasi ko‘tarildi. Biroq o‘shanda ovoz berishni amalga oshirishning iloji bo‘lmadi - parlamentda 108 o‘rinni egallagan “Fuqarolik kuchi” partiyasi a’zolari jarayonni boykot qildi.
Parlament a’zolari impichmentni qo‘llab-quvvatlagandan so‘ng, bu masalani Janubiy Koreya Konstitutsiyaviy sudi ko‘rib chiqishi kerak. Endilikda prezident vazifasini vaqtincha mamlakat bosh vaziri Xan Dak Su bajaradi.
Izoh (0)