Ukraina prezidenti Vladimir Zelenskiy urush tugaganidan so‘ng xavfsizlikni ta’minlash uchun AQSHni tinchlikparvar kuchlar yuborishga chaqirdi. U tegishli bayonotni Davosdagi Jahon iqtisodiy sammitida e’lon qildi.
Urushning tugashi Putin uchun emas, Tramp uchun g‘alaba bo‘lishi kerak. Putin unga hech kim emas, dedi Zelenskiy.
Prezident tinchlik kelishuviga Ukrainaning orqasidan erishilmasligi kerakligi, bunday kelishuv amalga oshirilganda esa uning bajarilishini kafolatlash uchun Ukrainaga kuchli harbiy kuch zarur bo‘lishini aytdi.
U faqat Yevropa ittifoqchilarining qo‘llab-quvvatlashi yetarli bo‘lmasligini ta’kidladi:
AQSHsiz bunday narsaga erishib bo‘lmaydi. Garchi evropalik do‘stlarimiz bu mumkin deb o‘ylasa ham, yo‘q, bu imkonsiz. Hech kim AQSHsiz riskka bormaydi, dedi Ukraina prezidenti.
Tramp va uning jamoasi a’zolarining bayonotlariga ko‘ra, yangi ma’muriyat Ukraina xavfsizligini ta’minlash missiyasini Yevropa davlatlariga yuklamoqchi. Tramp Amerika armiyasi tinchlikparvarlik missiyasida ishtirok etmasligini ta’kidlagan.
Reuters agentligi yozishicha, Tramp jamoasining eng yuqori lavozimli a’zolari Ukrainaga jiddiy xavfsizlik kafolatlarini berish tarafdori bo‘lib, bular orasida Yevropa qo‘shinlari tomonidan nazorat qilinadigan demilitarizatsiya hududini tashkil etish ham bor.
Yevropa davlatlarida Putinga haqiqiy to‘siq bo‘lish uchun askarlar yetarli emas va AQSHsiz kontingent yaratish NATOda bo‘linish keltirib chiqarishi mumkin, degan edi Zelenskiy.
U forum davomidagi nutqida “kamida 200 000” nafar Yevropa askari zarur bo‘lishini ta’kidlagan.
♦ Ukrainaning urushni tugatish shartlari
Ukraina qo‘shinlarni 1991-yil chegaralariga olib chiqishni nazarda tutuvchi “tinchlik formulasi”ni amalga oshirishni talab qilmoqda. Gap 2014 va 2022-yillarda Rossiya tomonidan u yerda o‘tkazilgan “referendumlar” va Ukrainaning Qrim, Donetsk, Lugansk, Xerson va Zaporojye viloyatlari noqonuniy anneksiya qilingani haqida ketmoqda. Moskva “tinchlik formulasi” asosida muzokaralar olib borish imkoniyatini istisno qiladi.
♦ Rossiya shartlari
Putin o‘t ochishni to‘xtatish uchun o‘z shartlarini ilgari surdi, jumladan, Ukraina qo‘shinlari o‘zini o‘zi mustaqil deb e’lon qilingan DXR, LXR, Xerson va Zaporojye viloyatlaridan olib chiqilishi, ushbu to‘rtta hudud va Qrim go‘yoki xalqaro miqyosda Rossiyaning bir qismi sifatida tan olinishi, Ukrainaning NATOga a’zolikdan voz kechishi va sanksiyalarni olib tashlash. Zelenskiy bu taklifni “ishonib bo‘lmaydigan” ultimatum deb atadi.
Izoh (0)